కాంగ్రెస్​లో​ 'రావత్​' అలజడి.. దిల్లీ పెద్దల పిలుపు

Harish Rawat rebel: ఉత్తరాఖండ్​ రాజకీయాల్లో సంచలనం సృష్టించిన మాజీ ముఖ్యమంత్రి హరీశ్​ రావత్ వ్యాఖ్యలతో కాంగ్రెస్​ నాయకత్వం అప్రమత్తమైంది. పార్టీలో నెలకొన్న సంక్షోభాని తెరదించేందుకు చర్యలు చేపట్టింది. హరీశ్​ రావత్​ సహా రాష్ట్ర అగ్రనేతలను దిల్లీకి పిలిచింది. వారంతా శుక్రవారం దిల్లీకి వెళ్లనున్నారు.

Harish Rawat rebel: కాంగ్రెస్​ నాయకత్వంపై బహిరంగంగానే విమర్శలు గుప్పించి ఆ పార్టీలో అలజడి సృష్టించారు సీనియర్​ నేత, ఉత్తరాఖండ్​ మాజీ ముఖ్యమంత్రి హరీశ్​ రావత్​. పార్టీ నేతలు తన చేతులను కట్టేశారని ఆరోపించారు. కొద్ది నెలల్లో జరగబోయే ఎన్నికల్లో గెలిచి అధికారాన్ని చేజిక్కించుకోవాలనుకుంటున్న తరుణంలో రావత్​ ధిక్కరణ స్వరం కాంగ్రెస్​కు తలనొప్పిలా మారే అవకాశాలు కనిపిస్తున్నాయి. ఈ క్రమంలో ఆ పార్టీ అధిష్ఠానం అప్రమత్తమైంది. సమస్యలపై చర్చించేందుకు దిల్లీకి రావాలని రావత్​ను ఆహ్వానించింది.

కాంగ్రెస్​ అధ్యక్షురాలు సోనియా గాంధీ, రాహుల్​ గాంధీతో భేటీ అయ్యేందుకు రావత్​ శుక్రవారం దిల్లీ వెళ్లనున్నారని పార్టీ వర్గాలు తెలిపాయి. రావత్​తో పాటు కాంగ్రెస్​ శాసనసభాపక్ష నేత ప్రీతమ్​ సింగ్​, ఉత్తరాఖండ్​ కాంగ్రెస్​ అధ్యక్షుడు గణేశ్​ గొడియాల్​, పార్టీ సీనియర్​ నేత యాశ్​పాల్​ ఆర్య సైతం దిల్లీకి వెళ్లనున్నారని పేర్కొన్నాయి.

బుధవారం వరుస ట్వీట్ల ద్వారా కాంగ్రెస్​ నాయకత్వంపై హరీశ్​ రావత్​ విమర్శలు గుప్పించిన క్రమంలో.. దిల్లీలో భేటీలు ప్రాధాన్యం సంతరించుకున్నాయి.

ట్విట్టర్​ వేదికగా విమర్శలు..

ఎన్నికలు అనే సముద్రంలో ఈదాల్సి ఉందని, అయితే చాలా చోట్ల పార్టీ మద్దతు తెలపాల్సింది పోయి.. వెన్నుచూపి నెగెటివ్​ రోల్​ పోషిస్తోందని వరుస ట్వీట్లు​ చేశారు హరీశ్​ రావత్​. 'అధికార పార్టీ చాలా మొసళ్లను సముద్రంలో వదిలింది. ఇప్పుడు.. నేను ఎవరినైతే అనుసరించాలో.. వారి అనుచరులే నా చేతులు, కాళ్లు కట్టేసేందుకు ప్రయత్నిస్తున్నారు. విశ్రాంతి తీసుకోవాల్సిన సమయం వచ్చిందనే ఆలోచనలతో నిండిపోయాను. నువ్వు చాలా కాలం ఈదుకొచ్చావు, ఇక చాలు హరీశ్​ రావత్​ అని నాలోని ఓ స్వరం చెబుతోంది. నేను సందిగ్ధంలో ఉన్నాను. నూతన సంవత్సరం నాకు మార్గాన్ని చూపుతుంది. ఈ పరిస్థితుల్లో కేదార్​నాథుడు నాకు మార్గనిర్దేశం చేస్తాడనే నమ్మకం ఉంది.' అని పేర్కొన్నారు.

ఆ తర్వాత ట్వీట్ల అంశంపై విలేకరులు ప్రశ్నించగా.. సమయం వచ్చినప్పుడు తానే అన్ని చెబుతానని అన్నారు రావత్.

ఇదీ చూడండి:హరీశ్​ రావత్ తిరుగుబాటు? తీవ్ర సంక్షోభంలోకి కాంగ్రెస్​?