ఛత్తీస్గఢ్ ముంగేలిలో దారుణం జరిగింది. 9 ఏళ్ల బాలికను హత్య చేసి నగ్నంగా పొదల్లో పడేశారు దుండగులు. దీనిపై కేసు నమోదు చేసుకున్న పోలీసులు.. దర్యాప్తు చేపట్టారు. బాలికపై అత్యాచారం చేసి అనంతరం హత్య చేసి ఉంటారని పోలీసులు అనుమానిస్తున్నారు.
గురువారం సాయంత్రం పశువులను మేపి ఇంటికి వెళ్తున్న కాపరులకు.. పొదల్లో ప్లాస్టిక్ సంచి కనిపించింది. దానిని తెరిచి చూడగా బాలిక మృతదేహం నగ్నంగా ఉంది. వెంటనే పోలీసులకు సమాచారం అందించారు గ్రామస్థులు. ఘటనా స్థలానికి చేరుకున్న పోలీసులు.. దర్యాప్తు చేపట్టారు. మృతదేహాన్ని స్వాధీనం చేసుకుని శవపరీక్ష నిమిత్తం ఆస్పత్రికి తరలించారు.
మహిళపై అత్యాచారానికి పాల్పడ్డ ఖాజీ:
తన భర్తతో ఉన్న గొడవను సద్దుమణిగించాలంటూ వచ్చిన మహిళను లైంగికంగా వేధించాడు ఖాజీ సైయ్యద్ మహ్మద్ కోయా. ఈ ఘటన కేరళ కొజికోడ్లో జరిగింది. 33 మహిళ తన భర్తతో ఉన్న గొడవను సద్దుమణిగించాలంటూ ఖాజీ వద్దకు వచ్చింది. ఈ క్రమంలోనే మహిళను పెళ్లి చేసుకుంటానంటూ నమ్మించిన ఖాజీ.. ఆమెపై పలుమార్లు అత్యాచారానికి పాల్పడ్డాడు. రెండేళ్లుగా తనపై అత్యాచారానికి పాల్పడుతున్నాడని పోలీసులకు ఫిర్యాదు చేసింది. దీనిపై కేసు నమోదు చేసుకున్న పోలీసులు.. దర్యాప్తు చేపట్టారు.
పిల్లలతో సహా నదిలో దూకి వివాహిత ఆత్మహత్య:
మహారాష్ట్ర బండారాలో దారుణం జరిగింది. ఓ వివాహిత తన ఇద్దరు కూతుళ్లతో కలిసి నదిలో దూకి ఆత్మహత్య చేసుకుంది. ఈ ఘటన శుక్రవారం జరగగా.. శనివారం ఉదయం నదిలో తేలుతున్న మృతదేహాలను గ్రామస్థులు గుర్తించి.. పోలీసులకు సమాచారం అందించారు. ఘటనా స్థలానికి చేరుకున్న పోలీసులు.. మృతదేహాలను స్వాధీనం చేసుకుని శవపరీక్ష నిమిత్తం ఆస్పత్రికి తరలించారు. మృతులను తిడ్డి గ్రామానికి చెందిన దీపాలి శీతల్(28), దేవాన్షి(3), వేదాన్షి(2)గా గుర్తించారు. దీనిపై కేసు నమోదు చేసుకున్న పోలీసులు.. ఆత్మహత్యకు గల కారణాలను అన్వేషిస్తున్నారు.