భారత తీర ప్రాంత రక్షణ దళ చరిత్రలో మరో సరికొత్త ఘట్టం ఆవిష్కృతమైంది. తేలిక పాటి ఆధునిక హెలికాప్టర్ ఏఎల్హెచ్ మార్క్-త్రీ.. తీర ప్రాంత రక్షణ దళంలో చేరింది. దిల్లీలో కేంద్ర రక్షణ శాఖ కార్యదర్శి అజయ్‌ కుమార్‌, తీర ప్రాంత రక్షణ దళం డైరెక్టర్‌ జనరల్‌ కే నటరాజన్‌, హిందుస్తాన్‌ ఏరోనాటిక్స్‌ లిమిటెడ్‌ సీఎండీ.. ఆర్‌ మాధవన్‌ సమక్షంలో జరిగిన ఈ కార్యక్రమంలో మూడు ఏఎల్హెచ్ మార్క్-త్రీ హెలికాప్టర్‌లను కోస్ట్‌గార్డ్‌కు అందజేశారు.
హిందుస్తాన్‌ ఏరోనాటిక్స్‌ పూర్తి స్వదేశీ సాంకేతిక పరిజ్ఞానంతో రూపొందించిన ఈ హెలికాప్టర్ అనేక అత్యాధునిక సౌకర్యాలు కలిగి ఉంది. హెలికాప్టర్‌లో నిఘా రాడార్‌, ఎలక్ట్రో ఆప్టిక్‌ పాడ్‌, అధిక తీవ్రత కల్గిన గాలింపు వ్యవస్ధ, మెషిన్‌ గన్‌ కల్గి ఉంది. భారతదేశ తీర ప్రాంత నిఘా, రక్షణలో ఈ హెలికాప్టర్లు అత్యంత కీలక పాత్ర పోషించనున్నాయి. విపత్తుల సమయంలో సహాయక చర్యల కోసం ఈ హెలికాప్టర్‌లో మెడికల్‌ ఇంటెన్సివ్‌ కేర్‌ యూనిట్‌ను కూడా ఏర్పాటు చేశారు. ప్రధానమంత్రి నరేంద్ర మోదీ చెప్పే ఆత్మనిర్భర్‌ భారత్‌, స్ధానిక వస్తువులకు ప్రాధాన్యం అనే నినాదాలకు ఏఎల్హెచ్ మార్క్-త్రీ హెలికాప్టర్ తయారీ ప్రతీక అని తీర ప్రాంత రక్షక దళ డైరెక్టర్‌ జనరల్‌ కెే నటరాజన్‌ అన్నారు. సవాళ్లతో కూడుకున్న సమయాన తీరప్రాంత రక్షణ దళంలో అడ్వాన్స్‌డ్‌ లైట్‌ హెలికాప్టర్ మార్క్-3 చేరిక వల్ల నౌకా సంబంధ కార్యకలాపాల్లో కొత్త దిశ వస్తుందని ఆశాభావం వ్యక్తం చేశారు.
"తీరప్రాంత రక్షక దళం వైమానిక విభాగం వృద్ధిలో హిందుస్తాన్‌ ఏరోనాటిక్స్‌ లిమిటెడ్‌ నమ్మకమైన భాగస్వామి. సవాళ్లతో కూడుకున్న సమయాన తీరప్రాంత రక్షక దళంలో అడ్వాన్స్‌డ్‌ లైట్‌ హెలికాప్టర్ మార్క్-3 చేరిక వల్ల నౌకా సంబంధ కార్యకలాపాల్లో కొత్త దిశ వస్తుంది. నిఘా కార్యకలాపాలు మరింత విస్తరించి..బలోపేతం అవుతాయి."