హెచ్​ఏఎల్​, బీఈఎల్​ మధ్య​ రూ.2,400 కోట్ల డీల్

HAL BEL deal: హిందుస్థాన్‌ ఏరోనాటిక్స్ లిమిటెడ్‌​, భారత్​ ఎలక్ట్రానిక్స్​ లిమిటెడ్ మధ్య కీలక ఒప్పందం కుదిరింది. తేజస్ ఎంకే1ఏ ప్రోగ్రామ్ కోసం 20 రకాల వ్యవస్థల అభివృద్ధి, సరఫరా కోసం ఉద్దేశించిన రూ.2,400 కోట్ల ఒప్పందంపై అధికారులు సంతకం చేశారు. మరోవైపు, దిగుమతి నిషేధం విధించిన రక్షణ పరికరాలను దేశీయంగా ఉత్పత్తి చేసేందుకు ఆర్డర్లు ఇవ్వనుంది కేంద్రం.

HAL BEL deal: ఆత్మనిర్భర్​ భారత్​ను ప్రోత్సాహించే దిశగా మరో ముందడుగు వేశాయి హిందుస్థాన్‌ ఏరోనాటిక్స్ లిమిటెడ్‌(హెచ్​ఏఎల్)​, భారత్​ ఎలక్ట్రానిక్స్​ లిమిటెడ్​(బీఈఎల్​). తేలికపాటి యుద్ధ విమానాలు(ఎల్​సీఏ) తేజస్ ఎంకే1ఏ ప్రోగ్రామ్ కోసం 20 రకాల వ్యవస్థల అభివృద్ధి, సరఫరా చేసేందుకు హెచ్​ఏఎల్​ ఒప్పందం కుదుర్చుకుంది. ఈ 2023 నుంచి 2028 వరకు ఐదేళ్ల కాలానికి జరిగిన ఈ ఒప్పందం విలువ రూ.2,400 కోట్లు. ఇప్పటివరకు ఈ రెండు సంస్థల మధ్య కుదిరిన ఒప్పందాల్లో ఇదే అతిపెద్దది కావడం గమనార్హం. క్రిటికల్​ ఏవియానిక్స్​ లైన్​ రీప్లేసబుల్​ యూనిట్లు (ఎల్​యూఆర్​ఎస్​), విమాన నియంత్రణ కంప్యూటర్లు, నైట్ ఫ్లయింగ్ ఎల్​యూఆర్​లను సరఫరా చేయడం ఈ ఒప్పందంలో కీలక అంశాలు.

హెచ్​ఏఎల్​, బీఈఎల్​ మధ్య​ రూ.2,400 కోట్ల ఒప్పందం​

Tejas mk1a HAL

"ఎల్​సీఏ తేజస్ ప్రోగ్రామ్​.. హెచ్​ఏఎల్​, రక్షణ పరిశోధన అభివృద్ధి సంస్థ(డీఆర్​డీఓ), బీఈఎల్​ వంటి భారతీయ రక్షణ సంస్థల మధ్య సమన్వయానికి అద్భుతమైన ఉదాహరణ. తేజస్ ఎంకే1ఏకు 20 రకాల క్రిటికల్ ఏవియానిక్స్ ఎల్​ఆర్​యూలు అభివృద్ధి, సరఫరా కోసం.. ఆత్మనిర్భర్​ భారత్​ ప్రోత్సహించే దిశగా ప్రస్తుత ఒప్పందం జరిగింది. స్వదేశీ ఉత్పత్తులకు హెచ్‌ఏఎల్ కట్టుబడి ఉంది" అని హెచ్‌ఏఎల్​ సీఎండీ ఆర్​ మాధవన్​ పేర్కొన్నారు.

'ప్రతిష్టాత్మక ఎల్​సీఏ తేజస్​ ప్రోగ్రామ్ కోసం హెచ్​ఏఎల్​ నుంచి ఆర్డర్ పొందినందుకు సంతోషంగా ఉంది. హెఏఎల్​తో బలమైన భాగస్వామ్యాన్ని కొనసాగించడానికి ఎదురుచూస్తున్నాం'​ అని బీఈఎల్​ సీఎండీ ఆనంది రామలింగమ్​ అన్నారు.

2023-24 ఆర్థిక సంవత్సరం నుంచి స్వదేశీ పరిజ్ఞానంతో తయారైన విమాన నియంత్రణ కంప్యూటర్లు, ఎయిర్ డేటా కంప్యూటర్లను వైమానికి దళానికి సరఫరా చేయనుంది బెల్. ఈ సిస్టమ్స్​ డీఆర్​డీఓ, ఎరోనాటికల్​ అభివృద్ధి ఏజెన్సీలకు చెందిన వివిధ ల్యాబ్​లలో రూపొందించారు.

83 తేజస్ ఎంకే1ఏ ఫైటర్ ఫ్లీట్ ఈ సిస్టమ్‌ల సరఫరా ఆర్డర్‌ను బెంగళూరు, పంచకుల (హరియాణా)లోని భారత్ ఎలక్ట్రానిక్స్ లిమిటెడ్ రెండు విభాగాలు అమలు చేస్తాయి. ఒప్పందం కుదుర్చుకున్న వస్తువులన్నీ బెల్​ ద్వారా బోర్డ్ టు బోర్డ్ కండీషన్‌లో హాల్​కు డెలివరీ చేస్తుంది.

Defence manufacturing in India

మరోవైపు, దిగుమతి నిషేధం విధించిన 216 రక్షణ పరికరాలను దేశీయంగా ఉత్పత్తి చేయాలని నిర్ణయించిన కేంద్రం.. ఈ ప్రక్రియను వేగవంతం చేస్తోంది. ఈ పరికరాల తయారీ కోసం ఆర్డర్లు ఇచ్చేందుకు సిద్ధమైంది. ఇందుకోసం త్రివిధ దళాలతో రక్షణ మంత్రిత్వ శాఖకు చెందిన సైనిక వ్యవహారాల శాఖ సంప్రదింపులు జరుపుతోంది.

ఈ జాబితాలోని పరికరాల ఆర్డర్లపై దృష్టిసారించాలని ప్రధానమంత్రి కార్యాలయం నుంచి ఆదేశాలు అందాయని అధికారులు తెలిపారు. వీటి ద్వారా దేశీయ రక్షణ రంగానికి ఊతం లభిస్తుందని చెప్పారు. ఈ జాబితాలో కొత్తతరం కార్వెట్‌ యుద్ధనౌకలు, గగనతల ముందస్తు హెచ్చరిక వ్యవస్థలు, ట్యాంకు ఇంజిన్లు, రాడార్లు వంటివి ఉన్నాయి. గతేడాది వరకు వీటిని విదేశాల నుంచి దిగుమతి చేసుకుంది కేంద్రం.

ఇదీ చదవండి:హెచ్​ఏఎల్​- బోయింగ్​ బంధంలో మరో మైలురాయి