విచిత్రంగా జడేజా 'ఫ్యామిలీ పాలిటిక్స్'.. భాజపా అభ్యర్థిగా భార్య.. కాంగ్రెస్​ ప్రచారకర్తగా చెల్లి

తన భార్యను గెలిపించాలంటూ ప్రముఖ క్రికెటర్ రవీంద్ర జడేజా జామ్​నగర్​లో రోడ్​షో నిర్వహించారు. అందుకు కాసేపటి ముందే ఆమెకు వ్యతిరేకంగా ప్రచారం చేసి, కాంగ్రెస్​ కోసం ఓట్లు అభ్యర్థించారు ఆయన సోదరి నయ్​నబా జడేజా. ఈ ఆసక్తికర సంఘటనకు గుజరాత్​ ఎన్నికలు వేదికయ్యాయి.

గుజరాత్​లో ఎన్నికలు సమీపిస్తున్న తరుణంలో అన్ని రాజకీయ పార్టీలు ప్రచారాన్ని హోరెత్తిస్తున్నాయి. ఈ క్రమంలోనే జామ్​నగర్​ నార్త్​ స్థానం రాష్ట్రవ్యాప్తంగా అందరి దృష్టిని ఆకర్షిస్తోంది. భాజపా తరఫున ప్రముఖ క్రికెటర్​ రవీంద్ర జడేజా భార్య పోటీచేస్తుండగా.. ఆమెకు ప్రత్యర్థి కాంగ్రెస్​ అభ్యర్థి తరఫున ప్రచారం చేస్తున్నారు ఆయన సోదరి నయ్​నబా జడేజా. ధరల పెరుగుదల.. అధికార పార్టీ వైఫల్యాలను ఎండగడుతూ ఓట్లను అడుగుతున్నారు.

ప్రచారం చేస్తున్న జడేజా సోదరి

జామ్​నగర్​ నార్త్​ నుంచి భాజపా తరఫున రవీంద్ర జడేజా భార్య రివాబా పోటీ చేస్తుండగా.. కాంగ్రెస్ నుంచి బిపేంద్రసింగ్​ జడేజా పోటీచేస్తున్నారు. తొలుత కాంగ్రెస్​ నుంచి టికెట్ ఆశించిన నయ్​నబాకు నిరాశే ఎదురైంది. దీంతో పార్టీ ప్రకటించిన అభ్యర్థికి మద్దతుగా నియోజకవర్గమంతా స్టార్​ క్యాంపైనర్​గా మారి ప్రచారం చేస్తున్నారు. భాజపా సైతం సిట్టింగ్​ ఎమ్మెల్యే ధర్మేంద్ర సింగ్​ జడేజాను పక్కకుపెట్టి రివాబాకు టికెట్​ కేటాయించింది.

రివాబా జడేజా

తనకు ఓ సిద్ధాంతం ఉందని.. దానిని అభిమానించే కాంగ్రెస్ పార్టీలోనే ఉన్నానని చెప్పారు నయ్​నబా జడేజా. ధరల పెరుగుదల, ప్రభుత్వ వైఫల్యాలపై విమర్శించిన ఆమె.. భాజపా హామీలు మాత్రమే ఇస్తోందని.. వాటిని నేరవేర్చదని ఆరోపించారు. అంతకుముందు గెలిచిన భాజపా అభ్యర్థి.. కాంగ్రెస్ వ్యక్తేనని, ఈ సారి గెలుపు తమదేనని ధీమా వ్యక్తం చేశారు.

ప్రచారం చేస్తున్న జడేజా సోదరి

జామ్​నగర్​ నార్త్​ పూర్తిగా పట్టణ ప్రాంతం కావడం వల్ల సహజంగానే భాజపాకు అనుకూలమని విశ్లేషకులు భావిస్తున్నారు. అయినా సరే ఈ సారి విజయం తమదేనని అంటున్నారు కాంగ్రెస్​ మద్దతుదారులు. భాజపా వైఫల్యాలు, సిట్టింగ్​ అభ్యర్ధి మార్పు తమకు లాభిస్తాయని చెబుతున్నారు. 2012 నియోజకవర్గాల పునర్విభజనలో ఈ నియోజకవర్గం ఏర్పడగా.. కాంగ్రెస్​ అభ్యర్థి విజయం సాధించారు. అనంతరం భాజపాలో చేరి.. 2017లోనూ గెలుపొందారు.

భార్య తరఫున ప్రచారం చేస్తున్న రవీంద్ర జడేజా

2019లో భాజపాలో చేరి రాజకీయ అరంగేట్రం చేసిన రివాబా.. గత కొన్నేళ్లుగా భాజపా తరఫున కార్యక్రమాల్లో పాల్గొంటున్నారు. రాజ్​పుత్​ వర్గానికి చెందిన ఆమె కమలదళంలో చేరడానికి ముందు 2018లో కర్ణిసేన మహిళా విభాగానికి చీఫ్​గా నియమితులయ్యారు. గుజరాత్​లో డిసెంబరు 1, 5న రెండు దశల్లో పోలింగ్ జరగనుంది. ఎన్నికల ఫలితాలు డిసెంబరు 8న వెలువడనున్నాయి.

భార్య తరఫున ప్రచారం చేస్తున్న రవీంద్ర జడేజా

ఇవీ చదవండి:విభిన్నంగా సాగుతున్న గుజరాత్​ ప్రచారం.. 'ఆప్'​ను ప్రత్యర్థిగా లెక్కచేయని భాజపా, కాంగ్రెస్​!