సింహాలను తరిమారు.. అటవీ అధికారులకు చిక్కారు

చీకట్లో సింహాలను వెంబడిస్తూ, భయపెట్టిన ఇద్దరు వ్యక్తులను పోలీసులు అరెస్టు చేశారు. ద్విచక్ర వాహనంపై వెళ్తూ, హారన్​ కొడుతూ నిందితులు వాటిని తరిమారు. సంబంధిత దృశ్యాలు సామాజిక మాధ్యమాల్లో వైరల్​ కాగా అధికారులు చర్యలు తీసుకున్నారు.

సింహాలను భయపెట్టిన వ్యక్తులను పోలీసులు అరెస్టు చేశారు. ఈ ఘటన గుజరాత్​ జూనాగఢ్​లో జరిగింది.

ద్విచక్రవాహనంపై వెళ్తున్న ఇద్దరు గుర్తు తెలియని వ్యక్తులు.. రెండు సింహాలను తరుముతున్న వీడియో.. సామాజిక మాధ్యమాల్లో వైరల్​ అయింది. హారన్​ కొడుతూ,పెద్దపెద్ద శబ్దాలు చేస్తూ వాటిని ఆ ఇరువురూ భయపెట్టారు.

ఈ వీడియో ఆధారంగా అటవీ అధికారులు దర్యాప్తు చేపట్టారు. గిర్​ తూర్పు అటవీ డివిజన్​లోని తులసీశ్యామ్​ గ్రామ సమీపంలో ఈ ఘటన జరిగినట్లుగా తెలుసుకున్నారు. నిందితుల్లో ఒకరిని సరాసియా గ్రామానికి చెందిన యునిస్​ పఠాన్​గా గుర్తించగా.. మరొక మైనర్​ ఉన్నాడు. వారిద్దరిపై అటవీ, వన్యప్రాణుల సంరక్షణ చట్టం కింద కేసు నమోదు చేశారు. పఠాన్​ను స్థానిక కోర్టు ముందు హాజరు పరిచారు. మైనర్​పై తగిన చర్యలు తీసుకుంటామని తెలిపారు.

వన్యప్రాణులను హింసిస్తే కఠిన చర్యలు తీసుకుంటామని అటవీ, వన్యప్రాణుల సంరక్షణ శాఖ ముఖ్య అధికారి డీటీ వాసవాద హెచ్చరించారు. ఇలాంటి నేరాల్లో 3 నుంచి 7 ఏళ్ల జైలు శిక్ష, రూ.25,000 జరిమానా ఉంటుందని పేర్కొన్నారు. ప్రజలెవరూ ఈ తరహా హింసలకు పాల్పడవద్దని సూచించారు.

ఇదీ చూడండి:పదేళ్ల బాలికతో తాంత్రికుడు సజీవ దహనం