'ఇలా అయితే కష్టమే!'- ప్రజల తీరుపై కేంద్రం తీవ్ర వ్యాఖ్యలు

దేశవ్యాప్తంగా చాలా మంది కొవిడ్ నిబంధనలు ఉల్లంఘించి విచ్చలవిడిగా తిరుగుతున్నారని కేంద్రం ఆందోళన వ్యక్తం చేసింది. థర్డ్ వేవ్ రాకుండా జాగ్రత్త పడాల్సిన బాధ్యత ప్రజలపై ఉందని గుర్తుచేసింది.

దేశవ్యాప్తంగా చాలా ప్రాంతాల్లో 'కొవిడ్ నిబంధనల ఉల్లంఘన'పై కేంద్ర ఆరోగ్య శాఖ ఆందోళన వ్యక్తం చేసింది. థర్డ్​ వేవ్​ గురించి ప్రజలు 'వాతావరణ అప్డేట్స్'​లా చర్చిస్తున్నారని పేర్కొన్నారు ఆరోగ్య శాఖ సంయుక్త కార్యదర్శి లవ్ అగర్వాల్. కానీ, కొవిడ్​ను అరికట్టేందుకు పాటించాల్సిన నిబంధనలను మరిచారని అన్నారు. మరిన్ని వేవ్​లు రాకుండా ముందుజాగ్రత్తలు పాటించాలనే ధ్యాసలో ప్రజలు లేకపోవడం బాధాకరమని తెలిపారు.

ఈ అంశంపై మాట్లాడిన నీతి ఆయోగ్ సభ్యుడు డాక్టర్ వీకే పాల్.. ప్రపంచవ్యాప్తంగా చాలా దేశాల్లో వైరస్​ మూడో ఉద్ధృతి పరిస్థితులు చూశామని అని అన్నారు. భారత్​లో ఈ పరిస్థితులు తలెత్తకుండా చూడాల్సిన బాధ్యత ప్రజలకే ఉందని గుర్తుచేశారు.

ఆ రాష్ట్రాల్లోనే..

దేశంలో జులైలో నమోదైన కేసుల్లో.. 73.4 శాతం కేసులు కేరళ, మహారాష్ట్ర, తమిళనాడు, ఆంధ్రప్రదేశ్, ఒడిశా రాష్ట్రాల నుంచే ఉన్నాయని లవ్ అగర్వాల్​ పేర్కొన్నారు.

కేంద్ర బృందాలు..

ఈ వారం 55 జిల్లాల్లో 10కిపైగా పాజిటివిటీ రేటు నమోదైందని అగర్వాల్ తెలిపారు. కొవిడ్ పరిస్థితులపై ఆరా తీసేందుకు.. మహారాష్ట్ర, ఛత్తీస్​గఢ్, అసోం, మేఘాలయ, ఒడిశా, మిజోరామ్, అరుణాచల్ ప్రదేశ్, మణిపూర్, నాగాలాండ్, త్రిపురకు కేంద్ర బృందాలను పంపినట్లు వెల్లడించారు.

పెరిగిన మరణాలు..

దేశంలో కొత్తగా 2,020 మంది వైరస్​ కారణంగా ప్రాణాలు కోల్పోయారు. దీంతో​ మరణాల సంఖ్య 4,10,784కు పెరిగింది. 31,443 మందికి కొత్తగా వైరస్​ సోకగా.. మొత్తం కేసుల సంఖ్య 3,09,05,819కు చేరింది.

ఇదీ చదవండి:'కరోనా వేరియంట్లపై ఓ కన్నేసి ఉంచాలి'