మహారాష్ట్ర మాజీ హోంమంత్రి, ఎన్సీపీ నేత అనిల్ దేశ్ముఖ్కు సుప్రీంకోర్టులో నిరాశ ఎదురైంది. బాంబే హైకోర్టు.. సీబీఐ విచారణకు ఆదేశించడాన్ని సవాల్ చేస్తూ దేశ్ముఖ్ సహా మహారాష్ట్ర ప్రభుత్వం దాఖలు చేసిన రెండు పిటిషన్లను సుప్రీంకోర్టు కొట్టివేసింది.
దేశ్ముఖ్పై వచ్చిన ఆరోపణలపై స్వతంత్ర సంస్థ ద్వారా దర్యాప్తు చేయించాల్సిన అవసరం ఉందని సుప్రీంకోర్టు అభిప్రాయపడింది. ఆరోపణల స్వభావం, ఈ విషయంలో ప్రమేయం ఉన్న వ్యక్తులను బట్టి.. దీనిపై విచారణ చేపట్టాల్సిన అవసరం ఉందని పేర్కొంది.
తన వాదనలు వినకుండానే సీబీఐ దర్యాప్తునకు హైకోర్టు ఆదేశం ఇచ్చిందని సుప్రీంకోర్టుకు వివరించారు దేశ్ముఖ్. ఎలాంటి ఆధారాలు లేకుండానే తనపై ఆరోపణలు చేశారని పేర్కొన్నారు. అయితే, దేశ్ముఖ్ వాదనలను సుప్రీం తోసిపుచ్చింది. ఇది ప్రాథమిక దర్యాప్తు మాత్రమేనని పేర్కొంది. సీనియర్ మంత్రులపై సీనియర్ అధికారులు తీవ్రమైన ఆరోపణలు చేసినప్పుడు విచారణ చేయడంలో తప్పులేదని స్పష్టం చేసింది.
"కేసులో ప్రమేయం ఉన్న వ్యక్తులు, ఆరోపణల తీవ్రతను పరిగణనలోకి తీసుకుంటే.. స్వతంత్ర సంస్థ దర్యాప్తు అవసరమే. ఇది ప్రజల విశ్వాసానికి సంబంధించిన విషయం. సీబీఐ దర్యాప్తు చేయాలన్న హైకోర్టు ఉత్తర్వుల్లో జోక్యం చేసుకోవాలని అనుకోవడం లేదు. ఇది ప్రాథమిక దర్యాప్తు మాత్రమే. సీనియర్ అధికారులు చేసిన ఆరోపణలపై విచారణ చేయడంలో తప్పులేదు. కేసుకు సంబంధించిన ఇద్దరు వ్యక్తుల్లో ఒకరు.. పోలీస్ కమిషనర్, మరొకరు హోంమంత్రి. వీరిద్దరూ కలిసి పని చేసేవారే."