Winter Session 2021: 'అన్ని సమస్యలపై చర్చకు సిద్ధం'

Winter Session 2021: అన్ని సమస్యలపైనా చర్చించేందుకు, వాటికి సమాధానాలు చెప్పేందుకు కేంద్రం సిద్ధంగా ఉందని ప్రధాని నరేంద్రమోదీ(Pm modi news) స్పష్టం చేశారు. శీతాకాల సమావేశాల నేపథ్యంలో పార్లమెంట్ ఆవరణలో ఆయన ప్రసంగించారు.

Winter Session 2021: శీతాకాల సమావేశాల ప్రారంభం సందర్భంగా పార్లమెంట్ ఆవరణలో ప్రధాని నరేంద్ర మోదీ(Pm modi news) ప్రసంగించారు. పార్లమెంట్​లో ఇదొక ముఖ్యమైన సెషన్​ అని అన్నారు. జాతీయ ప్రయోజనాలకు సంబంధించిన అంశాలపై చర్చలు జరపాలని ప్రజలు కోరుకుంటున్నారని, అలాంటి చర్చలే దేశాభివృద్ధికి బాటలు వేస్తాయని తెలిపారు.

" ఈ శీతాకాల సమావేశంలో అన్ని సమస్యలనూ చర్చించేందుకు మా ప్రభుత్వం సిద్ధంగా ఉంది. మనం పార్లమెంట్​లో డిబేట్ నిర్వహించాలి. దీంతోపాటు సభామర్యాదనూ కాపాడాలి. ఇదో ముఖ్యమైన పార్లమెంటరీ సెషన్. జాతీయ ప్రయోజనాలకు సంబంధించిన అంశాలపై చర్చలు జరపాలని ప్రజలు కోరుకుంటున్నారు."

-- ప్రధాని నరేంద్ర మోదీ

సీనియర్ కేబినెట్​ మంత్రులతో భేటీ..

పార్లమెంట్​ శీతాకాల సమావేశాలకు ముందు సీనియర్ కేబినెట్ మంత్రులతో ప్రధాని మోదీ భేటీ అయ్యారు. ఈ సమావేశంలో రక్షణశాఖ మంత్రి రాజ్​నాథ్ సింగ్, కేంద్రహోం మంత్రి అమిత్​షా, వ్యవసాయశాఖ మంత్రి నరేంద్రసింగ్​ తోమర్, వాణిజ్యశాఖ మంత్రి పీయుష్ గోయల్, పార్లమెంటరీ వ్యవహారాల శాఖ మంతి ప్రహ్లాద్​ జోషీ.. పాల్గొన్నారు.

మార్చి వరకు ఉచిత రేషన్..

దేశంలోని పేదలకు ఉచితంగా ఆహార ధాన్యాలను అందించే 'ప్రధానమంత్రి గరీబ్ కల్యాణ్​ యోజన' పథకాన్ని 2022 మార్చి వరకు పొడిగించినట్లు ప్రధాని నరేంద్రమోదీ తెలిపారు. ఈ నిర్ణయంతో 80కోట్లమంది పేదలకు లబ్ధి చేకూరుతుందన్నారు.

అప్రమత్తంగా ఉండాలి..

కొవిడ్​-19 కొత్త వేరియంట్ 'ఒమిక్రాన్​' వ్యాప్తి దృష్ట్యా ప్రజలు అప్రమత్తంగా ఉండాలని ప్రధాని మోదీ సూచించారు. ఇప్పటికే 100 కోట్ల టీకా డోసులు అందించామని, 150 కోట్ల డోసులు అందించే దిశగా.. ముందుకెళ్తున్నామన్నారు.

పార్లమెంట్​లో అన్ని సమస్యలపైనా చర్చించేందుకు, వాటికి సమాధానాలు చెప్పేందుకు కేంద్రం సిద్ధంగా ఉందని మోదీ స్పష్టం చేశారు మోదీ. పార్లమెంటు శీతాకాల సమావేశాలు డిసెంబరు 23 వరకు జరగనున్నాయి.

ఇదీ చూడండి:ఎన్నికల వేళ శీతాకాల సమావేశాలు.. పైచేయి ఎవరిదో?