ఎస్సీల కోసం ఫిర్యాదు పరిష్కార పోర్టల్​

అంబేడ్కర్​ జయంతి సందర్భంగా షెడ్యూల్​ కులాలకు చెందిన వారి కోసం ఫిర్యాదు పరిష్కార పోర్టల్​ను ప్రారంభించింది కేంద్రం. ఈ పోర్టల్​ను కేంద్ర మంత్రి రవిశంకర్ ప్రసాద్​ ఆవిష్కరించారు.

షెడ్యూల్డ్​ కులాలకు చెందిన వారు ఫిర్యాదులు చేయడానికి కేంద్రం ప్రభుత్వం బుధవారం ఓ పోర్టల్​ను ప్రారంభించింది. ఈ ఫిర్యాదు పరిష్కార పోర్టల్​ను జాతీయ షెడ్యూల్​ కులాల కమిషన్​ అభివృద్ధి చేసింది. భారత రాజ్యాంగ సృష్టికర్త డా. బీఆర్ అంబేడ్కర్ జయంతి సందర్భంగా కేంద్ర ఐటీ శాఖ మంత్రి రవిశంకర్ ప్రసాద్.. ఈ పోర్టల్​ను ప్రారంభించారు.

ఈ సందర్భంగా మాట్లాడిన ఆయన.. దేశ నిర్మాణంలో అంబేడ్కర్​ కృషిని గుర్తుచేసుకున్నారు. దేశ పురోగతి రాజ్యాంగబద్ధంగా ఉండాలని అంబేడ్కర్​ సూచించినట్లు తెలిపారు. ప్రభుత్వం చేపట్టిన డిజిటల్​ ఇండియా పథకంలో భాగంగా ఈ పోర్టల్​ను ఆవిష్కరించినట్లు పేర్కొన్నారు.

'ఈ పోర్టల్​తో షెడ్యూల్​ కులాలకు చెందిన వారు ఫిర్యాదులను నమోదు చేయవచ్చు. ఇందుకుగాను వారికి ఓ గుర్తింపు పత్రం వస్తుంది. ప్రతి ఫిర్యాదుకు ప్రత్యేకమైన సంఖ్య ఉంటుంది. దాని ద్వారా నోడల్​ ఆఫీసర్​ ఫిర్యాదుల పరిష్కారానికి కృషి చేస్తారు' అని ఓ అధికారి వివరించారు.

ఇదీ చూడండి:బాబాసాహెబ్​కు మోదీ, రాహుల్ నివాళి