పార్లమెంటు సమావేశాలు సోమవారం నుంచి జరగనున్న నేపథ్యంలో అధికార, విపక్షాలు అందుకు సన్నద్ధమవుతున్నాయి. ఈ సమావేశాల్లో కరోనాను ఎదుర్కోవడం, ధరల పెరుగుదలపై చర్చకు ప్రభుత్వం సమ్మతించే అవకాశం ఉంది. వీటిని ప్రస్తావించాలని ప్రతిపక్షాలు నిర్ణయించడంతో ప్రభుత్వం కూడా సిద్ధపడుతోంది. ఇవికాకుండా రఫేల్‌ యుద్ధ విమానాల కొనుగోలు, దేశ ఆర్థిక పరిస్థితులు తదితర సమస్యలను కూడా లేవనెత్తాలని విపక్షాలు భావిస్తున్నాయి. ఈ సమావేశాల్లో కొత్తగా 17 బిల్లులు ప్రవేశపెట్టే అవకాశం ఉంది. ఇవి కాకుండా లోక్‌సభలో నాలుగు, రాజ్యసభలో మూడు బిల్లులు పెండింగ్‌లో ఉన్నాయి.
నేడు అఖిలపక్ష నేతలతో వెంకయ్యనాయుడు సమావేశం
రాజ్యసభ ఛైర్మన్ ఎం.వెంకయ్యనాయుడు శనివారం సాయంత్రం అఖిలపక్ష నేతలతో భేటీ కానున్నారు. వర్షాకాల సమావేశాల నేపథ్యంలో 40కిపైగా పార్టీల నాయకులు హాజరు కానున్నారు.