'నక్సలిజంపై విజయం తథ్యం'

నక్సలిజం నిర్మూలనకు కేంద్రం కట్టుబడి ఉందన్నారు కేంద్ర హోం మంత్రి అమిత్ షా. జగదల్​పుర్​లో ఉన్నతాధికారులతో సమావేశమైన అనంతరం మీడియాతో మాట్లాడారు షా. జవాన్ల కుటుంబాలకు దేశం మొత్తం అండగా ఉందన్నారు.

నక్సలిజాన్ని రూపుమాపేందుకు కేంద్రం కట్టుబడి ఉందని కేంద్ర హోం శాఖ మంత్రి అమిత్ షా స్పష్టం చేశారు. జవాన్ల త్యాగాలను వృథా కానివ్వమన్నారు. 22 మంది జవాన్ల అమరులైన బీజాపుర్​ ఎన్​కౌంటర్​పై జగదల్​పుర్​లో ఉన్నతాధికారులతో సమావేశమైన అనంతరం మీడియాతో మాట్లాడారు షా.

" అమర జవాన్ల ధైర్య సాహసాలు, త్యాగాలను దేశం ఎన్నటికీ మరవదు. దేశం మొత్తం వారి కుటుంబాలకు అండగా ఉంటుంది. నక్సలిజాన్ని రూపుమాపేందుకు కేంద్రం కట్టుబడి ఉంది. ఈ పోరాటాన్ని మరింత ఉద్ధృతం చేస్తాం. చివరకు గెలిచి తీరతాం. గత కొన్నేళ్లుగా దట్టమైన అటవీ ప్రాంతాల్లోనూ భద్రతా బలగాలు స్థావరాలు ఏర్పాటు చేస్తున్నాయి. దీనిని జీర్ణించుకోలేకే నక్సలైట్లు ఇలాంటి దాడులకు పాల్పడుతున్నారు.

-- కేంద్ర హోం మంత్రి అమిత్​ షా

నక్సలైట్లను అణచివేసేందుకు రాష్ట్ర ప్రభుత్వాలతో కలిసి కేంద్రం పనిచేస్తుందన్నారు షా. ఛత్తీస్​గఢ్ ముఖ్యమంత్రి భూపేశ్​ బఘోల్​, జగదల్​పుర్​లోని ఉన్నతాధికారులతో సమావేశమైనట్లు తెలిపారు. నక్సల్స్​పై పోరాటాన్ని బలోపేతం చేయాలని అధికారులు సూచించినట్లు వెల్లడించారు.

ఇదీ చదవండి :అమర జవాన్లకు అమిత్​ షా నివాళి