దేవుడి మాన్యంలో పండిన పంటను విక్రయించబోయిన ఓ దేవాలయ అర్చకుడికి వింత అనుభవం ఎదురైంది. దేవుడి ఆధార్ కార్డు ఇస్తేనే ధాన్యం కొనుగోలు జరుగుతుందని అధికారులు చెప్పడం వల్ల అర్చకుడు అవాక్కయ్యాడు. ఈ విచిత్ర సంఘటన ఉత్తర్ప్రదేశ్లోని కుర్హార గ్రామంలో జరిగింది.
గ్రామంలోని రామ్‌ జానకి ఆలయానికి మహంత్‌ రామ్‌కుమార్‌ దాస్‌ ప్రధాన అర్చకుడు. అలాగే దేవుడి పేరుమీద ఉన్న ఏడు హెక్టార్ల పంటభూమికి బాధ్యుడు. ఆ పొలంలో పండిన 100 క్వింటాళ్ల గోధుమలను విక్రయించడానికి రెండ్రోజుల కిందట ప్రభుత్వ మార్కెట్‌కి వెళ్లాడు. పంట కొనుగోలుకు ముందు అధికారులు భూయజమాని వివరాలను ఆన్‌లైన్‌లో రిజిస్ట్రర్‌ చేసుకుంటారు. ఈ క్రమంలో మహంత్‌ రామ్‌ కుమార్‌ను కూడా భూయజమాని వివరాలు అడిగారు. అది దేవుడి మాన్యం అని చెప్పగా.. భూమి ఎవరు పేరుపై ఉందో.. వారి ఆధార్ కార్డు ఉంటేనే పంట కొనుగోలు వీలు అవుతుందని స్పష్టం చేశారు. దేవుడికి ఆధార్ కార్డు లేకపోయేసరికి మాన్యం పంట కొనుగోలు ప్రక్రియను అధికారులు రద్దు చేశారు.