Gandhi Peace Prize : 2021 ఏడాదికి గాను గాంధీ శాంతి పురస్కారాన్ని ప్రకటించింది కేంద్ర ప్రభుత్వం. జాతిపిత మహాత్మా గాంధీ పేరిట ఏటా అందజేసే ఈ అవార్డ్కు.. ఉత్తర్ప్రదేశ్లోని గోరఖ్‌పూర్‌ చెందిన ప్రఖ్యాత గీతాప్రెస్ను ఎంపిక చేసింది. అహింస, గాంధేయ పద్ధతుల్లో సామాజిక, ఆర్థిక, రాజకీయ పరివర్తన కోసం అందించిన విశేష కృషికి గుర్తింపుగా.. గీతాప్రెస్ ప్రచురణ సంస్థను ఈ పురస్కారానికి ఎంపిక చేసినట్టు కేంద్ర ప్రభుత్వం వెల్లడించింది. ఈ మేరకు సాంస్కృతిక మంత్రిత్వశాఖ ఓ ప్రకటన విడుదల చేసింది.
ప్రధాని నరేంద్ర మోదీ సారథ్యంలోని జ్యూరీ.. పురస్కారానికి గీతా ప్రెస్‌ను ఏకగ్రీవంగా ఎంపిక చేసినట్టు కేంద్రం వెల్లడించింది. శాంతి, సామాజిక సామరస్యత అనే గాంధీజీ ఆశయాలను ప్రచారం చేయడంలో గీతాప్రెస్ ఎంతో కృషి చేసిందని ప్రభుత్వం పేర్కొంది. ఈ సందర్భంగా గీతాప్రెస్ను ప్రధాని గుర్తు చేసుకున్నట్టు సాంస్కృతిక మంత్రిత్వ శాఖ తన ప్రకటనలో పేర్కొంది. గీతాప్రెస్ స్థాపించి వందేళ్లు పూర్తి కావస్తోంది. ఈ నేపథ్యంలో గాంధీ శాంతి పురస్కారానికి ఎంపిక కావడం సామాజిక సేవలో ఆ సంస్థ కృషికి దక్కిన గొప్ప గుర్తింపని తెలిపింది. 1923లో ప్రారంభమైన గీతాప్రెస్.. ప్రపంచంలోనే అతిపెద్ద ప్రచురణ సంస్థల్లో ఒకటిగా విరాజిల్లుతోంది. పద్నాలుగు భాషల్లో 41.7 కోట్లకు పైగా పుస్తకాలను ప్రచురించి ఈ సంస్థ రికార్డు నెలకొల్పింది. వీటిల్లో దాదాపు 16.21 కోట్లు.. శ్రీమద్‌ భగవద్గీత పుస్తకాలే కావటం విశేషం.