'అమితాబ్​, అక్షయ్​.. సినిమాలను అడ్డుకుంటాం'

పెట్రో ధరల పెరుగుదలపై నటులు అమితాబ్​ బచ్చన్​, అక్షయ్​ కుమార్​ స్పందించకుంటే వారి సినిమా షూటింగ్​లను నిలిపివేస్తామని మహారాష్ట్ర కాంగ్రెస్​ అధ్యక్షుడు నానా పటోలే తెలిపారు. కాంగ్రెస్​ హయాంలో పెట్రో ధరలు పెరిగినప్పుడు నిరసన వ్యక్తం చేసిన వారు.. ఇప్పుడు ఎందుకు మౌనంగా ఉన్నారని ధ్వజమెత్తారు.

ఇంధన ధరల పెరుగుదలపై బాలీవుడ్​ నటులు అమితాబ్​ బచ్చన్, అక్షయ్​ కుమార్​ స్పందించకుంటే.. ​వారి సినిమా ప్రదర్శనలను మహారాష్ట్రలో నిలిపివేస్తామని ఆ రాష్ట్ర కాంగ్రెస్​ అధ్యక్షుడు నానా పటోలే హెచ్చరించారు. వారి సినిమా షూటింగ్​లను అనుమతించబోమని తెలిపారు. యూపీఏ ప్రభుత్వ హయాంలో చమురు ధరల పెరుగుదలకు వ్యతిరేకంగా గళమెత్తిన సదరు నటులు.. ఇప్పుడు ఎందుకు మౌనంగా ఉన్నారని ప్రశ్నించారు.

"మన్మోహన్ సింగ్​ ప్రభుత్వ హయాంలో ఇంధన ధరలు పెరిగినప్పుడు అమితాబ్​ బచ్చన్​, అక్షయ్​ కుమార్​ వంటి నటులు ట్వీట్ల ద్వారా విమర్శలు చేశారు. మరి ఇప్పుడు పెట్రో ధరలు పెరిగినప్పుడు ఎందుకు నిశ్శబ్దంగా ఉన్నారు. దీనిపై వారు స్పందించకుంటే వారి సినిమాలు, షూటింగ్​లను మహారాష్ట్రలో అనుమతించం. ఇప్పుడు కూడా వారు ఆ విధంగానే.. కేంద్ర ప్రభుత్వ వ్యతిరేక విధానాలకు నిరసన తెలపాలి."

--నానా పటోలే, మహారాష్ట్ర కాంగ్రెస్​ చీఫ్​

పెరిగిన పెట్రో ధరలతో సాధారణ పౌరులు ఇబ్బంది పడుతున్నారని పటోలే అన్నారు. మహారాష్ట్ర తదితర ప్రాంతాల్లో లీటర్​ పెట్రోల్​ ధర రూ.100 మార్కును చేరిన నేపథ్యంలో పటోలే ఈ వ్యాఖ్యలు చేశారు. కేంద్ర ప్రభుత్వం ఇటీవల తప్పనిసరి చేసిన ఫాస్ట్​ట్యాగ్​ విధానాన్ని పటోలే విమర్శించారు.

'ఇది నానా పటోలే పబ్లిసిటీ స్టంట్'​

నానా పటోలే వ్యాఖ్యలపై భాజపా స్పందించింది. ప్రజస్వామ్యం, చట్టాలున్న దేశంలో సినిమా షూటింగ్​లను ఎవరైనా ఎలా ఆపగలరని ఆ పార్టీ నేత దేవేంద్ర ఫడణవీస్​ ప్రశ్నించారు. కాంగ్రెస్​ అధ్యక్షునిగా నూతనంగా ఎన్నికైన నానా పటోలే.. ప్రజలను ఆకర్షించేందుకే ఇలాంటి వ్యాఖ్యలు చేస్తున్నారని విమర్శించారు.

ఇదీ చదవండి:మేం అధికారంలోకి వస్తే మహిళలకు 33% కోటా: షా