ఇది ఖైదీల 'ఫ్రీడమ్'​ బ్యూటీ పార్లర్​ గురూ!

'ఫ్రీడమ్​' కేరళలో ఈ పేరు ఇప్పుడు చాలా ఫేమస్​. ఈ బ్రాండ్​ పేరుతో ప్రజల కోసం ఎన్నో రకాల ఉత్పత్తులను, సేవలను అందుబాటులోకి తెచ్చారు ఇక్కడి ఖైదీలు. ఇప్పుడు మరో అడుగు ముందుకేసి బ్యూటీ పార్లర్​ సేవలను అందిస్తున్నారు. ఆ విశేషాలేంటో తెలుసుకోవాలంటే ఈ కథనంలోకి వెళ్లాల్సిందే!

కేరళ జైళ్ల శాఖ అధికారులు మరో వినూత్న కార్యక్రమానికి తెరతీశారు. 'ఫ్రీడమ్​ లుక్స్​' పేరుతో పురుషులు, పిల్లల కోసం బ్యూటీ పార్లర్​ను ఏర్పాటు చేశారు. అయితే.. ఖైదీలే ఈ బ్యూటీపార్లర్​ను నిర్వహిస్తుండడం ఆసక్తికరమైన అంశం. త్రిస్సూర్​ జిల్లా వియ్యూర్​ జైలు పార్కు సమీపంలో ఏర్పాటు చేసిన ఈ పార్లర్​కు విశేషాదరణ లభిస్తోంది. సరసమైన ధరలో, నాణ్యమైన సేవలను అందిస్తూ అందరి మన్ననలు పొందుతున్నారు ఇక్కడి ఖైదీలు.

ఆ భయం అక్కర్లేదు!

ఖైదీలు అనగానే ఎవరికైనా కాస్త బెరుకు ఉంటుంది. కానీ, ఇక్కడ అలాంటి భయాలేమీ అవసరం లేదు. ఎందుకంటే.. సత్ప్రవర్తన గల, బ్యూటిషియన్​ కోర్సు చేసిన ఖైదీలు ఈ పార్లర్​లో​ సేవలను అందిస్తారు. అందుకే అందరూ నిశ్చింతగా వీరి వద్ద​కు విచ్చేస్తున్నారు. ఉదయం 7:30 గంటల నుంచి రాత్రి 9 గంటల వరకు ఈ పార్లర్​ సేవలను అందిస్తున్నారు. తిరువనంతపురంలోని పూజప్పుర కారామానా రోడ్డులో ఇలాంటి మరో బ్యూటీ పార్లర్​ను అక్కడి ఖైదీలు నిర్వహిస్తున్నారు.

అటు ప్రజలకు.. ఇటు ఖైదీలకు.

ఇప్పటికే 'ఫ్రీడమ్' బ్రాండ్​తో కేరళ జైళ్ల శాఖ అధికారులు ఎన్నో విశేష కార్యక్రమాలు చేపట్టారు. ఫ్రీడమ్​ ఆహార పదార్థాలు, ఫ్రీడమ్​ పెట్రోల్​ పంప్​, ఫ్రీడమ్​ శానిటైజర్లు, మాస్కులు,ఫ్రీడమ్​ చెప్పులను తయారు చేసి, చక్కని ఆదరణ పొందారు. తాజాగా ఈ బ్యూటీ పార్లర్​ ఏర్పాటుతో మరెంతో మందికి చేరువవుతున్నారు. ప్రజలకు మంచి ధరలో వివిధ సేవలను, ఉత్పత్తులను అందిస్తున్న 'ఫ్రీడమ్​ బ్రాండ్​'కు కేరళలో మంచి గుర్తింపు లభిస్తోంది. దానికి తోడు ఖైదీల ఆలోచన ధోరణిలో మార్పు తెచ్చేందుకు దోహదం చేస్తోందని చెబుతున్నారు జైళ్ల శాఖ అధికారులు.

ఇదీ చూడండి:వెయ్యి రూపాయల 'టీ' ఎప్పుడైనా తాగారా?