ఆ కార్డులతో యాచకులు, దివ్యాంగులకు ఉచిత భోజనం

తిండిగింజలు సంపాదించుకునే సత్తువ కోల్పోయిన వయసులోనో, విధి వంచనకు గురై, దివ్యాంగులుగా మారో.. తప్పని పరిస్థితుల్లో ఆత్మాభిమానం చంపుకుని, యాచకులుగా మారుతున్న వారెందరో. మరోవైపు బద్ధకంతో భిక్షమెత్తుకోవడానికి అలవాటు పడుతున్న వారి సంఖ్యా విపరీతంగా పెరిగిపోతోంది. వీరి కారణంగా అర్హులకు ఆదరణ కరవవుతోంది. ఈ సమస్యకు ఓ పరిష్కారంతో వచ్చింది బెల్గాంకు చెందిన ఓ యువబృందం.

కూటి కోసమే కోటివిద్యలు అంటారు. ప్రతి జీవికీ ఆకలే ప్రధాన సమస్య. పనిచేసి, డబ్బు సంపాదించుకోలేని వాళ్లు కడుపు నింపుకునేందుకే యాచకులుగా మారతారు. ప్రస్తుతం ప్రతిచోటా యాచకుల సంఖ్య విపరీతంగా పెరిగిపోతోంది. కష్టపడి పని చేసుకోగలిగిన వాళ్లు కూడా భిక్షమెత్తుకోవడం కనిపిస్తోంది. వీళ్ల వల్ల ఏ పనీ చేయలేక యాచకులుగా మారినవారికీ, దివ్యాంగులకూ సమస్యలు వచ్చిపడుతున్నాయి. ఆహారం దొరక్క అల్లాడుతున్నారు. ఈ సమస్యకు పరిష్కారంతో వచ్చింది బెల్గాంకు చెందిన ఓ యువబృందం.

ఇంజినీరుగా పనిచేస్తున్న బెల్గాంకు చెందిన ఆర్బీ మాలి.. ఆకలితో అలమటిస్తున్నవారి కడుపు నింపేందుకు కృషి చేస్తున్నాడు. డీఎఫ్​ ఫౌండేషన్ స్థాపించి.. 20 మంది యువకులతో చేతులు కలిపాడు. యాచకులు ఉచిత భోజనం అందించే కార్డులు అందిస్తున్నాడు. హోటల్ అసోసియేషన్ సైతం మాలి చేస్తున్న మంచిపనికి పూర్తి సహకారం అందిస్తున్నారు.

"ఆకలితో బాధపడుతున్న వారికి హోటళ్ల నుంచి ఉచితంగా ఆహారం అందించేలా డియర్ హుడ్‌ఫుడ్ కార్డులు అందిస్తోంది డీఎఫ్ ఫౌండేషన్. చేతికి డబ్బులివ్వడమో, ఆహార పొట్లాలు అందించడం కంటే ఈ పని చేయడం ఉత్తమమని అనిపించి, ఏర్పాట్లు చేశాం."

- ఆర్బీ మాలి, డీఎఫ్ ఫౌండేషన్ సీఈఓ

డియర్ హుడ్‌ఫుడ్ కార్డులు.. ఏటీఎం కార్డుల్లానే ఉంటాయి. హోటళ్లలో ఉచిత భోజనం కోసం వీటిని నగరంలోని ఏ పనీ చేయలేని యాచకులు, వృద్ధులకు పంపిణీ చేశారు. ఒక్కో కార్డు ధర 10 రూపాయలు. ఈ కార్డు ఉన్నవారెవరైనా.. ఆయా హోటళ్లకు వెళ్లి, అల్పాహారం, స్నాక్స్ ఉచితంగా పొందవచ్చు. రెండు డియర్ హుడ్‌ఫుడ్ కార్డులు ఇచ్చి, భోజనం తెచ్చుకోవచ్చు.

నగరంలోని హోటళ్లలో జనవరి మొదటివారం నుంచి ఈ కార్డు ద్వారా నిరుపేదలకు కడుపునిండా భోజనం అందిస్తున్నారు. ఈ కార్డులు స్వీకరించే హోటళ్ల ప్రధాన ద్వారం వద్ద స్టిక్కర్లు అంటిస్తారు. ఈ బృంద సభ్యుల సహకారంతో కుందనగిరిలో పస్తులు పడుకునే వాళ్లందరి కడుపూ నిండుతోంది. ఇప్పటికే వేలాదిమంది యాచకులు, వృద్ధులకు ఈ కార్డులు అందజేసింది డీఎఫ్ ఫౌండేషన్.

"ఈ యువకులు చాలా మంచి పని చేస్తున్నారు. హోటళ్ల యజమానులుగా వారి పనిని మేం పూర్తిగా అభినందిస్తున్నాం. బెల్గాంలో 450కి పైగా హోటళ్లున్నాయి. యాచకుల నుంచి ఈ కార్డు స్వీకరించాలని వాళ్లందరికీ సూచిస్తున్నాం."

- హితేశ్ త్రివేది, హోటల్ అసోసియేషన్ అధ్యక్షుడు

2022 కల్లా గుళ్లు, రైల్వే స్టేషన్లు, బస్టాపులు సహా నగరంలోని వివిధ ప్రాంతాల్లో ఉండే యాచకులందరికీ ఈ కార్డు అందించాలని సంస్థ లక్ష్యంగా పెట్టుకుంది. మానసిక సమస్యలతో బాధపడుతున్న వారిని బెల్గాం కార్పొరేషన్ పరిధిలోని పునరావాస కేంద్రానికి పంపే పనిలోనూ చురుగ్గా పాల్గొంటున్నారు సంస్థ సభ్యులు.

ఇదీ చూడండి:ఎలాంటి వ్యాయామ పరికరమైనా.. కేరాఫ్ 'హైటెక్​ రామ్​'