Former CM KCR Admitted to Yashoda Hospital : మాజీ ముఖ్యమంత్రి, బీఆర్ఎస్ అధినేత కేసీఆర్కి యశోద ఆస్పత్రి వైద్యులు తుంటి మార్పిడి శస్త్రచికిత్సను విజయవంతంగా పూర్తి చేశారు. గురువారం రాత్రి ఎర్రవెల్లిలోని తన ఫాంహౌస్లో కాలుజారి కేసీఆర్ పడిపోయారు. వెంటనే కుటుంబ సభ్యులు ఆయనను సోమాజీగూడలోని యశోద ఆస్పత్రికి తరలించారు. డాక్టర్ ఎంవీ రావు ఆధ్వర్యంలోని వివిధ విభాగాలకు చెందిన వైద్యుల బృందం పరీక్షల అనంతరం ఆయన శస్త్రచికిత్స చేయాలని నిర్ణయించి, సాయంత్రం చికిత్సను చేశారు.
ఆస్పత్రిలో చికిత్స పొందుతున్న తమ అధినేతను పరామర్శించేందుకు మాజీ మంత్రులు, బీఆర్ఎస్ ఎమ్మెల్యేలు, ఎమ్మెల్సీలు, పలువురు నేతలు ఆసుపత్రికి భారీగా చేరుకున్నారు. మాజీ మంత్రి కేటీఆర్, కవిత,కేసీఆర్ సతీమణి శోభా, సంతోశ్, హరీశ్రావు సహా పలువురు బీఆర్ఎస్ నేతలు ఉదయం నుంచి ఆస్పత్రిలోనే ఉండి కేసీఆర్ ఆరోగ్య పరిస్థితులను ఎప్పటికప్పుడు తెలుసుకుంటున్నారు. మాజీ సీఎం కేసీఆర్కు మెరుగైన వైద్య సహాయం అందేలా చూడాలని సీఎం రేవంత్ రెడ్డి ఆస్పత్రి వర్గాలను ఆదేశించారు. వ్యక్తిగత కారణాలతో యశోద ఆస్పత్రికి వచ్చిన కాంగ్రెస్ సీనియర్ నేత జానారెడ్డి, నాగం జనార్ధన్ రెడ్డిలు సైతం కేసీఆర్ను పరామర్శించి వెళ్లారు.
"నిన్న కేసీఆర్ బాత్‌రూమ్‌లో జారిపడ్డారు. నొప్పి ఎక్కువగా ఉండటంతో ఆస్పత్రికి తీసుకొచ్చాం. కేసీఆర్కు వైద్యులు అన్ని పరీక్షలు నిర్వహించారు. తుంటి ఎముక విరిగిందని చెప్పారు. సాయంత్రం కేసీఆర్కు శస్త్రచికిత్స చేయాలని నిర్ణయించారు. శస్త్రచికిత్స తర్వాత వైద్యులు హెల్త్ బులెటిన్‌ విడుదల చేస్తారు. ఆస్పత్రి వద్దకు ఎవరూ రావొద్దని వైద్యులు చెబుతున్నారు. బీఆర్ఎస్ శ్రేణులు, కేసీఆర్ అభిమానులు ఆస్పత్రి వద్దకు రావొద్దు. కేసీఆర్ ఆరోగ్యం మెరుగు పడేందుకు ప్రార్థనలు, పూజలు చేయండి. కేసీఆర్ కోలుకోవడానికి మరో 6 నుంచి 8 వారాల సమయం పట్టే అవకాశం ఉంది. అప్పటి వరకు నేతలు సంయమనం పాటించాలి." - హరీశ్రావు, మాజీ మంత్రి
కేసీఆర్ ఆరోగ్య పరిస్థితిపై సీఎం రేవంత్ రెడ్డి ఆరా : ఇదిలా ఉండగా కేసీఆర్ ఆరోగ్య పరిస్థితిని పర్యవేక్షించాలని ముఖ్యమంత్రి రేవంత్ రెడ్డి రాష్ట్ర వైద్యారోగ్య శాఖ కార్యదర్శి రిజ్వీని ఆదేశించారు. సీఎం ఆదేశాల మేరకు యశోద ఆసుపత్రికి వెళ్లిన ఆయన, వైద్యులతో మాట్లాడి కేసీఆర్ ఆరోగ్య పరిస్థితి గురించి తెలుసుకున్నారు. అనంతరం కేసీఆర్ ఆరోగ్య పరిస్థితిని రిజ్వీ రేవంత్కు వివరించారు. కేసీఆర్ త్వరగా కోలుకోవాలని సీఎం రేవంత్ ఆకాంక్షించారు. అలాగే కాంగ్రెస్ పార్టీ సీనియర్ నేత జానారెడ్డి తన కుమారుడితో కలిసి యశోద ఆసుపత్రికి వెళ్లి పరామర్శించారు.
చాలా బాధేసింది : కేసీఆర్ ఆరోగ్యంపై ప్రధానమంత్రి నరేంద్ర మోదీ స్పందించారు. 'తెలంగాణ మాజీ ముఖ్యమంత్రి కేసీఆర్కు గాయం అయ్యిందని తెలిసి చాలా బాధపడ్డాను. ఆయన త్వరగా కోలుకోవాలని, మంచి ఆరోగ్యంతో తిరిగి రావాలని ప్రార్థిస్తున్నాను.' అని ట్వీట్ చేశారు. కేసీఆర్ ఆరోగ్యంపై స్పందించిన గవర్నర్‌ తమిళిసై సౌందరరాజన్‌, కేసీఆర్కు గాయం కావడం బాధ కలిగించిందన్నారు. కేసీఆర్ త్వరగా కోలుకోవాలని ట్వీట్ చేశారు.