Priyanka Gandhi Rana Kapoor: కాంగ్రెస్ జాతీయ ప్రధాన కార్యదర్శి ప్రియాంక గాంధీ వాద్రా నుంచి ఎంఎఫ్ హుస్సేన్ పెయింటింగ్ను రూ.2కోట్లకు కొనుగోలు చేయాలని తనపై ఒత్తిడి చేసినట్లు ఎస్ బ్యాంక్ వ్యవస్థాపకుడు రాణా కపూర్ తెలిపారు. నాటి యూపీఏ ప్రభుత్వంలో కేంద్ర మంత్రిగా ఉన్న మురళీ దేవరా బలవంతం చేసినట్లు ఎన్ఫోర్స్మెంట్ డెరక్టరెట్ (ఈడీ)కి ఇచ్చిన వాంగ్మూలంలో పేర్కొన్నారు. బదులుగా తనకు పద్మభూషణ్ పురస్కారం లభిస్తుందనే హామీ ఇచ్చినట్లు వెల్లడించారు. ఈ వివరాలను ముంబయిలోని ప్రత్యేక కోర్టులో దాఖలు చేసిన ఛార్జ్షీట్లో ఈడీ ప్రస్తావించింది.
ఈ నిధులతో సోనియాకు చికిత్స!: చెక్కు ద్వారా తాను అందించిన రూ.2 కోట్లను న్యూయార్క్లో సోనియా గాంధీ చికిత్స కోసం వినియోగించినట్లు రాణా కపూర్ తెలిపారు. అయితే తనకు ఇచ్చిన హామీ మాత్రం నెరవేరలేదని అన్నారు. "సోనియా చికిత్సకు సహకరించడం ద్వారా ఆ కుటుంబానికి చాలా మంచి పని చేశానని ఆమె సన్నిహితుడు అహ్మద్ పటేల్ నాతో అన్నారు. నాకు పద్మభూషణ్ అందడంలో ఇది తోడ్పడుతందని చెప్పారు. అయితే ఈ కొనుగోలు బలవంతంగా జరిగింది, అందుకు నేను సిద్ధంగా లేను" అని రాణా పేర్కొన్నారు.
రాణా కపూర్, ఆయన కుటుంబంపై నమోదైన మనీలాండరింగ్ కేసును ఈడీ దర్యాప్తు చేస్తోంది. గౌతమ్ థాపర్కు చెందిన అవంతా కంపెనీకి ఎస్ బ్యాంక్ నుంచి అక్రమంగా రూ.1900 కోట్ల రుణాన్ని అందిచడంపైనా కేసు నమోదైంది. అందుకోసం రాణాకు రూ.300 కోట్ల లంచం ముట్టిందని ఈడీ ఆరోపించింది.
భార్యకు తెలియకుండానే: 58 కంపెనీలు, పదుల కొద్దీ అనుబంధ సంస్థలతో దాదాపు 100కు పైగా కంపెనీలు ఏర్పాటు చేసి దాదాపు రూ.670 కోట్లను రాణా కపూర్ దారి మళ్లించారని ఈడీ రెండో అదనపు ఛార్జ్షీట్లో పేర్కొంది. వాటిని అమెరికా, యూకేలో ఆస్తుల కొనుగులుకు వినియోగించినట్లు వెల్లడించింది. పూర్తిగా అతడి భార్య బిందు పేరిట ఉన్న ఆర్ఏబీ ఎంటర్ప్రైజెస్కు రూ.832 కోట్లను రాణా అందించినట్లు ఏప్రిల్ తొలినాళ్లలో దాఖలు చేసిన ఛార్జ్షీట్లో తెలిపింది. అయితే కేవలం గృహిణిగా ఉన్న ఆమెకు ఈ నిధులు ఎక్కడి నుంచి, ఎందుకు వచ్చాయనేది అవగాహన లేదని వివరించింది.
ఇదీ రాణాపై కేసు:డీహెచ్ఎఫ్ఎల్పై లఖ్నవూ పోలీసులు నమోదు చేసిన చీటింగ్ కేసు ఆధారంగా రాణా కపూర్, ఆయన భార్య, కూతుళ్లు, డీహెచ్ఎఫ్ఎల్ ప్రమోటర్ కపిల్ వధవాన్ సహా పలువురు ఎస్ బ్యాంక్ అధికారులపై 2019 డిసెంబర్లో ఈడీ దర్యాప్తు ప్రారంభించింది. ఈడీ ప్రకారం.. 2018 ఏప్రిల్ నుంచి జూన్ మధ్యలో డీహెచ్ఎఫ్ఎల్ స్వల్పకాలిక డిబెంచర్లలో ఎస్ బ్యాంక్ రూ.3700 కోట్ల పెట్టుబడి పెట్టింది. అనంతరం ఓ డీహెచ్ఎఫ్ఎల్ సబ్సిడరీకి రూ.750 కోట్ల రుణాన్ని కూడా మంజూరు చేసింది. బదులుగా రాణా కపూర్ కుటుంబానికి చెందిన ఓ సంస్థకు నిబంధనలకు విరుద్ధంగా రూ.600 కోట్ల రుణాన్ని డీహెచ్ఎఫ్ఎల్ అందినట్లు ఈడీ పేర్కొంది. అయితే దీనిపై విచారణ జరుగుతున్న క్రమంలోనే 2020 మార్చిలో విదేశాల్లోని తన ఆస్తులను జప్తు చేయకుండా వాటిని అమ్మేందుకు రాణా తీవ్రంగా ప్రయత్నించినట్లు ఈడీ వెల్లడించింది.
ఇదీ చూడండి:రాణా కపూర్‌కు చెందిన రూ.127 కోట్ల ఫ్లాట్‌ సీజ్‌!
