Swiggy Delivery Boy: ప్రస్తుత రోజుల్లో ఏం కావాలన్నా మార్కెట్లకు వెళ్లి కొనే సమయం లేక అందరూ ఆన్లైన్ యాప్ల్లోనే ఆర్డరు పెట్టేస్తున్నారు. ఒక్క ఫుడ్ మాత్రమే కాదు.. ప్రతి ఒక్క వస్తువు ఆన్లైన్లో దొరికేస్తుంది. ఈ క్రమంలో కొన్నిసార్లు వింత వింత సంఘటనలు జరుగుతుంటాయి. నవ్వులు పూయించే వ్యవహారాలు బయటకు వస్తుంటాయి. తాజాగా బెంగుళూరులో ఇలాంటి సంఘటన వెలుగులోకి వచ్చింది. ఓ వ్యక్తి స్విగ్గీలో కాఫీ ఆర్డర్ ఇస్తే.. డెలివరీ బాయ్ ఏం చేశాడో తెలుసా? తాను డెలివరీ చేయకుండా.. బద్ధకంతో మరో యాప్ ద్వారా ఇంకో డెలివరీ బాయ్‌తో కాఫీని పంపించాడు.
అబ్బా.. ఓపిక లేదు.. బెంగళూరుకు చెందిన ఒక వ్యక్తి స్విగ్గీలో కేఫ్ కాఫీ డే(సీసీడీ) అవుట్‌లెట్‌‌లో కాఫీ ఆర్డర్ ఇచ్చాడు. ఆ ఆర్డర్ ఓ డెలివరీ బాయ్‌కు వెళ్లింది. అతడు కాఫీని పికప్ చేసుకునేందుకు సీసీడీ అవుట్‌లెట్‌కు వెళ్లాడు. కాఫీ తీసుకున్న తర్వాత.. తన మనసు మారింది. ''అబ్బా.. ఓపిక లేదు.. అంత దూరం వెళ్లి ఇవ్వాలా? '' అని అనుకున్నాడు. బైక్‌పై కస్టమర్‌ ఇంటికి వెళ్లి.. కాఫీ ఇవ్వలేక.. బద్ధకంతో టెక్నాలజీని ఉపయోగించుకున్నాడు. 'డుంజో' అనే మరో యాప్ ద్వారా ఇంకో డెలివరీ బాయ్‌ను ఎంచుకున్నాడు. అతడు లొకేషన్‌కు రాగానే.. భయ్యా.. ఈ ఆర్డర్‌ను డెలివరీ చేయమని చెప్పి డబ్బులిచ్చాడు. అనంతరం డుంజో డెలివరీ బాయ్ ఆ ఆర్డర్ తీసుకెళ్లి కస్టమర్‌కు అందజేశాడు.
5 స్టార్ రేటింగ్ ఇవ్వు భయ్యా.. కాసేపటి తర్వాత స్విగ్గీ డెలివరీ బాయ్ నుంచి ఆ కస్టమర్‌కు ఫోన్ కాల్ వచ్చింది. "మీ ఆర్డర్ పికప్ చేసుకొని.. డుంజో చేశాను.. ప్లీజ్ 5 స్టార్ రేటింగ్ ఇవ్వండి" అని కోరాడు. కాఫీ ఆర్డర్ చేసిన ఆ వ్యక్తి తన స్నేహితుడితో దీని గురించి వాట్సాప్‌లో చర్చించగా.. ఆ స్క్రీన్‌ షాట్‌ను ఓంకార్ జోషి అనే వ్యక్తి ట్విట్టర్లో పోస్ట్ చేశారు. అది వైరల్‌గా మారింది.