వరదల బీభత్సం- దెబ్బతిన్న ఇళ్లు, దుకాణాలు

హిమాచల్ ప్రదేశ్‌లో ఆకస్మిక వరదలు బీభత్సం సృష్టించాయి. ధర్మశాల వీధుల్లో నిలిపిన కార్లు కొట్టుకుపోయాయి. కాల్వలు ఉప్పొంగి ప్రవహిస్తున్నాయి. పలు చోట్ల దుకాణాలు దెబ్బతినగా.. జనజీవనం స్తంభించిపోయింది. కర్ణాటకలో భారీ వర్షాలకు వారం రోజుల్లో ఆరుగురు ప్రాణాలు కోల్పోయారు.

వరదల దాటికి హిమాచల్ ప్రదేశ్‌ అతలాకుతలం అవుతోంది. ఎడతెరిపి లేకుండా కురుస్తున్న వర్షానికి ధర్మశాలలోని భగ్సునాగ్‌లో ఆకస్మిక వరదలు పోటెత్తాయి. రోడ్డుపై ఉన్న కార్లు కాగితం పడవల్లా కొట్టుకుపోయాయి. చేసేదేం లేక ప్రజలు చూస్తూ ఉండిపోయారు. కొన్ని వాహనాలు నీటిలో తేలియాడాయి. వరదలో వాహనాలు కొట్టుకుపోతున్న దృశ్యాలను స్థానికులు సెల్ ఫోన్లలో బంధించారు.

దెబ్బతిన్న దుకాణాలు..

ధర్మశాల పరిసర ప్రాంతంలో వరద తీవ్రత ఎక్కువగా ఉంది. భారీ వర్షాల దాటికి నదులు, కాలువలు ఉద్ధృతంగా ప్రవహిస్తున్నాయి. వరద దాటికి మంజీ నది పరిసరాల్లో సుమారు 10 దుకాణ సముదాయాలు దెబ్బతిన్నాయి. పలు చోట్ల వరదనీరు రహదారిపైనుంచి ప్రవహించింది.

నీటి ఉద్ధృతి..

ఆదివారం అర్థరాత్రి నుంచి కాంగ్రా జిల్లాలో కురిసిన వర్షం కారణంగా పర్యాటక పట్టణం ధర్మశాలలోని వరదలాంటి పరిస్థితి తలెత్తింది. భగ్సునాగ్ నాలా కాస్త నదిగా మారిపోయింది. నీటి ప్రవాహం చాలా వేగంగా ఉంది. నీటి ఉద్ధృతికి రహదారిపై చాలా వాహనాలు కొట్టుకుపోగా.. ఇద్దరు వ్యక్తులు గల్లంతయ్యారు. ఒడ్డున నిర్మించిన ఇళ్ళు, హోటళ్ళు, మార్కెట్‌కు తీవ్ర నష్టం కలిగింది.

పర్వతాలపై మేఘ విస్ఫోటనం జరిగి ఆకస్మిక వరదలు సంభవించినట్లు భావిస్తున్నారు. పోలీసు బృందాలు సహాయక చర్యలు చేపట్టాయి. పర్యాటకులు, స్థానిక ప్రజలు..నదులు, కాలువలకు దూరంగా ఉండాలని అధికారులు హెచ్చరికలు జారీ చేశారు.

ఆరుగురు మృతి..

భారీ వర్షాల కారణంగా కర్ణాటకను వరదలు ముంచెత్తాయి. వరదల ధాటికి వారం రోజుల్లో ఆరుగురు మృతిచెందారు. బల్కీ మండలం కుదవంద్​పుర్​లో ఆదివారం పిడుగు పడి తల్లికూతుళ్లు మృతిచెందినట్లు పోలీసులు తెలిపారు. చిత్రదుర్గ ప్రాంతంలో గోడ కూలి తల్లి, మూడేళ్ల చిన్నారి మృతిచెందినట్లు పేర్కొన్నారు. వరదల కారణంగా కాల్వి గ్రామానికి చెందిన దంపతులు నీట మునిగినట్లు తెలిపారు.

ఉత్తర కర్ణాటకలో వరద ఉద్ధృతి అధికంగా ఉంది. ఉత్తర కన్నడ, ఉడిపి, దక్షిణ కన్నడ, చిక్కమగళూరు, కొడగు, శివమొగ్గ ప్రాంతాల్లో విస్తారంగా వర్షాలు కురుస్తున్నాయి.

ఇదీ చదవండి :సీజనల్​ వ్యాధులకు ఈ జాగ్రత్తలతో చెక్​!