తేజస్వీ సహా 18 మందిపై కేసు నమోదు

పోలీసుల అనుమతి లేకుండా నిరసన ప్రదర్శనలు చేపట్టినందుకు ఆర్జేడీ నేత తేజస్వీ యాదవ్​తో పాటు మరో 18 మందిపై పట్నా పోలీసులు కేసు నమోదు చేశారు. అంటువ్యాధుల నిరోధక చట్టం ప్రకారం వీరిపై ఎఫ్​ఐఆర్​ నమోదు చేసినట్లు అధికారులు తెలిపారు.

నిషేధిత ప్రాంతంలో అనుమతి లేకుండా నిరసన ప్రదర్శన చేపట్టినందుకు ఆర్జేడీ నేత తేజస్వీ యాదవ్​ సహా మరో 18 మంది విపక్ష నాయకులపై పోలీసులు కేసు నమోదు చేశారు. కేంద్రం తీసుకొచ్చిన కొత్త వ్యవసాయ చట్టాలకు వ్యతిరేకంగా పట్నాలోని గాంధీ మైదానంలో నాలుగో నెంబర్ గేటు వద్ద తేజస్వీ యాదవ్​, ఆర్జేడీ మిత్రిపక్షాలు నిరసన ప్రదర్శన చేపట్టాయి.

మైదానంలో జరిగిన అందోళనలకు హాజరైన 18 మంది నాయకులతో పాటు మరో 500 కార్యకర్తల పైనా ఎఫ్‌ఐఆర్ నమోదు చేసినట్లు పోలీసు వర్గాలు తెలిపాయి. వీరిపై ఐపీసీలోని పలు సెక్షన్​లు, అంటువ్యాధుల నిరోధక చట్టం ప్రకారం కేసు నమోదు చేసినట్లు పేర్కొన్నాయి.

నగర నడిబొడ్డున ఉన్న గాంధీ మైదానం సమీపంలో ప్రదర్శన నిర్వహించడం ద్వారా ప్రభుత్వ ఉత్తర్వులను ఉల్లంఘించి... ప్రజల ప్రాణాలకు ముప్పు చేకూర్చినట్లు ఎఫ్​ఐఆర్​లో పేర్కొన్నారు. ప్రస్తుతం అమలులో ఉన్న కరోనా నిబంధనలను బేఖాతరు చేశారని తెలిపారు. కేసు నమోదు చేసిన వారిలో తేజస్వీతో పాటు శ్యామ్​ రజాక్​, బ్రిశేన్​ పటేల్​, అలోక్​ మెహతా, మృత్యుంజయ్​ తివారీ, మరి కొంత మంది కాంగ్రెస్​, సీపీఐ నాయకులు ఉన్నట్లు పేర్కొన్నారు.