దిల్లీ మహిళా కమిషన్, దిల్లీ పోలీసులు కలిసి ఓ నాలుగు నెలల ఆడబిడ్డను రక్షించారు. ఆ బిడ్డ ఆరు రోజుల వయస్సు ఉన్నప్పుడే తండ్రి అమ్మేయగా.. ఈ నెల 26న పసికందును దిల్లీలోని జహన్గిర్పురి ప్రాంతంలో కాపాడారు. నిందితుడిని మాత్రం పోలీసు ఇంకా అరెస్టు చేయలేదు. ఈ విషయాన్ని ప్రస్తావిస్తూ.. ఇందుకు గల కారణాలు తెలపాలని పోలీసులకు కమిషన్ లేఖ రాసింది.
ఇలా రక్షించారు..
ఓ తండ్రి పసికందును అమ్మేసినట్టు ఈ నెల 21న దిల్లీలోని షాబాద్ డైరీ ప్రాంతంలో.. కమిషన్కు చెందిన మహిళా పంచాయతీ బృందానికి సమాచారం అందింది. ఈ వ్యవహారంపై డీసీడబ్ల్యూ విజ్ఞప్తితో ఈ నెల 23న పోలీసులు కేసు నమోదు చేశారు. అనంతరం మధు అనే మహిళను విచారించారు. ఆ శిశువును హరియాణాలోని పానిపట్లో అమ్మినట్టు ఆమె అంగీకరించింది. ఆ మహిళను తీసుకుని పోలీసులు పానిపట్కు వెళ్లారు. కానీ శిశువు కనిపించలేదు.
కమిషన్ దర్యాప్తు చేపట్టి ఎట్టకేలకు పసికందు ఆచూకీని కనుగొంది. జహన్గిర్పురి ప్రాంతంలోని ఓ న్యాయవాది ఇంట్లో పసికందు ఉన్నట్టు గుర్తించారు. పానిపట్కు చెందిన మహేశ్, మరో మహిళ వద్ద నుంచి శిశువును తీసుకున్నట్టు న్యాయవాది వెల్లడించారు. పసికందును రక్షించిన అనంతరం వైద్యపరీక్షలు నిర్వహించి వసతి గృహానికి తరలించారు.
'ఆరు రోజుల పసికందును ఓ తండ్రి అమ్మేశాడని దిల్లీలోని షాబాద్ డైరీ ప్రాంతంలోని మహిళా కమిషన్ పంచాయత్ బృందానికి సమాచారం అందింది. దిల్లీ పోలీసులతో కలిసి దర్యాప్తు చేపట్టాము. విచారణలో భాగంగా.. తన బిడ్డ పుట్టక ముందే మరణించిందని తల్లిని నమ్మించి, ఆ పసికందును తండ్రి అమ్మేశాడని తేలింది. ఇది చాలా దురదృష్టకరం, ఘటనపై ముమ్మర దర్యాప్తు జరపాలి. నిందితుడిని అరెస్ట్ చేయాలి' అని డీసీడబ్ల్యూ ఛైర్మన్ స్వాతి మాలివాల్ డిమాండ్ చేశారు.
ఇదీ చూడండి:-కోర్టులో పాఠం చెప్పిన ధర్మాసనం.. న్యాయమూర్తులే గురువులు
