సాగుచట్టాలకు వ్యతిరేకంగా నెలరోజులకు పైగా దిల్లీ సరిహద్దుల్లో పోరుబాట సాగిస్తున్న అన్నదాతలతో కేంద్ర ప్రభుత్వం జరుపుతున్న చర్చల్లో కాస్త ముందడగు పడింది. విజ్ఞాన్ భవన్ వేదికగా వ్యవసాయ మంత్రి నరేంద్ర సింగ్ తోమర్ నేతృత్వంలోని కేంద్ర మంత్రుల బృందానికి, 41 రైతు సంఘాలకు మధ్య ఐదుగంటలపాటు జరిగిన ఆరో విడత చర్చల్లో ఈ మేరకు పురోగతి వచ్చింది. వ్యవసాయ చట్టాలరద్దు, కనీస మద్దతు ధరకు చట్టబద్ధత, దిల్లీలో వాయు నాణ్యత ఆర్డినెన్స్, విద్యుత్ బిల్లులలో సవరణలకు రైతులు పట్టుబట్టగా, గాలి నాణ్యత ఆర్డినెన్స్, విద్యుత్ బిల్లులలో సవరణలకు ఇరుపక్షాల మధ్య ఏకాభిప్రాయం కుదిరింది.
సుహృద్భావ వాతావరణంలో చర్చలు జరిగాయన్న కేంద్ర వ్యవసాయశాఖ మంత్రి నరేంద్ర సింగ్ తోమర్..సగం అంశాలపై ఏకాభిప్రాయం సాధించామని, మిగతా రెండింటిపై చర్చించేందుకు జనవరి 4న మరోసారి సమావేశం కానున్నట్లు తెలిపారు.
"సమావేశంలో రైతులు చర్చకు ఉంచిన నాలుగు అంశాల్లో రెండింటిపై ప్రభుత్వం, రైతు సంఘాల మధ్య ఏకాభిప్రాయం కుదిరింది. పర్యావరణంతో సంబంధం ఉన్న ఆర్డినెన్స్‌లోని అంశాలపై రైతులు ఆందోళనగా ఉన్నారు. రైతులు ఈ ఆర్డినెన్స్ పరిధిలోకి రావద్దని వారి భావన. ఈ అంశంలో ఇరుపక్షాల మధ్య అంగీకారం కుదిరింది. విద్యుత్ చట్టంలోని సంస్కరణలు అమలులోకి వస్తే తమకు నష్టం కలుగుతుందని రైతులు భావిస్తున్నారు. ఈ అంశంపై కూడా ఏకాభిప్రాయం కుదిరింది."
-నరేంద్ర సింగ్ తోమర్, కేంద్ర వ్యవసాయశాఖ మంత్రి