'ఈవీఎంలకు బదులుగా బ్యాలెట్​'.. విచారణకు సుప్రీం ఓకే

Supreme Court on EVM today: బ్యాలెట్​ విధానంలో ఎన్నికల నిర్వహణకు సంబంధించిన కీలక వ్యాజ్యంపై విచారణకు సుప్రీం కోర్టు అంగీకరించింది. ఈవీఎంలను ప్రవేశపెట్టేందుకు వీలుగా.. ప్రజాప్రాతినిధ్య చట్టంలో ఉన్న నిబంధనను సవాలుచేస్తూ దాఖలైన పిటిషన్​ను విచారణకు స్వీకరించింది.

Supreme Court on EVM today: దేశంలో చాలా కాలంగా చర్చనీయాంశమైన బ్యాలెట్​- ఈవీఎం వివాదం.. సుప్రీం కోర్టుకు చేరింది. ఎలక్ట్రానిక్ ఓటింగ్ యంత్రాలను ప్రవేశపెట్టేందుకు వీలు కల్పించేలా.. ప్రజాప్రాతినిధ్య చట్టంలో ఉన్న నిబంధన చట్టబద్ధతను సవాలు చేస్తూ సర్వోన్నత న్యాయస్థానంలో వ్యాజ్యం దాఖలైంది. ఆ చట్టంలోని 'సెక్షన్​ 61ఏ'కు పార్లమెంటు ఆమోదం లేదని, కాబట్టి అమలు చేయరాదని వాదిస్తూ.. న్యాయవాది ఎమ్​ఎల్​ శర్మ ఈ వ్యాజ్యం దాఖలు చేశారు. బ్యాలెట్ విధానంలోనే పోలింగ్ నిర్వహించాలని కోరారు.

శర్మ వ్యాజ్యాన్ని విచారణకు స్వీకరిస్తున్నట్లు ప్రధాన న్యాయమూర్తి జస్టిస్ ఎన్​వీ రమణ నేతృత్వంలోని ధర్మాసనం స్పష్టం చేసింది. త్వరలోనే దీనిపై వాదనలు ప్రారంభమయ్యే అవకాశముంది.