తండ్రి వారించినా పట్టుదలతో సుప్రీంకోర్టు ప్రధాన న్యాయమూర్తికి లేఖ పంపిన కేరళ చిన్నారి లిడ్వినా జోసెఫ్ ఇప్పుడు దేశవ్యాప్తంగా పత్రికల్లో పతాక శీర్షికలకెక్కింది. రోజూ పత్రిక చదివే అలవాటున్న ఆమెను దిల్లీలో కరోనా ఉద్ధృతి కారణంగా రోగులు పడుతున్న అవస్థలు కదిలించాయి. ఆక్సిజన్‌ కోసం అల్లాడుతున్న జనం.. అంత్యక్రియలు నిర్వహించడానికి పేర్చిన శవాలను చూసి చలించిపోయిన ఆమె ఎందుకలా జరుగుతోందని తన తండ్రి, భారత వాయుసేన విశ్రాంత ఉద్యోగి జోసెఫ్‌ను ఆరా తీసింది. మనం వాళ్లకు ఆక్సిజన్‌ అందించలేమా? అని ఆవేదన చెందింది.
ఆలా సుప్రీంకోర్టుపై గౌరవం..
అదే సమయంలో సుప్రీంకోర్టు జోక్యం చేసుకొని వేగంగా ఆక్సిజన్‌ అందించాలని ఉత్తర్వులు జారీ చేయడం.. తర్వాత పరిస్థితులు కుదుటపడి మరణాలు తగ్గడం చూసిన తన బిడ్డకు సుప్రీంకోర్టుపై గౌరవం పెరిగినట్లు జోసెఫ్ తెలిపారు. ధన్యవాదాలు చెబుతూ సుప్రీంకోర్టుకు లేఖ రాయాలన్న కాంక్షను ఆమె తన తండ్రి వద్ద వ్యక్తం చేసింది. అయితే ఆయన వారించారు. "నువ్వు అయిదో తరగతి చదివే అమ్మాయివి.. అంత పెద్ద న్యాయమూర్తులకు ఏమని రాస్తావు?" అని ప్రశ్నించారు. తొలుత నువ్వు ఏం రాయాలనుకుంటున్నావో రాసి చూపించమని సూచించారు. దీంతో లిడ్వినా జోసెఫ్ తన మనసులోని భావాలను కాగితంపై పెట్టి తండ్రికి చూపించింది.