'ఏడేళ్ల పాటు చంద్రయాన్-2 ఆర్బిటర్ సేవలు​'

చంద్రయాన్​-2 ఆర్బిటర్ ఏడాది పాటు మాత్రమే సేవలందిస్తుందని మొదట ఊహించినా.. అది ఏడేళ్ల పాటు పని చేస్తుందని ఆశిస్తున్నట్లు కేంద్ర మంత్రి జితేంద్ర సింగ్ తెలిపారు. చంద్రయాన్​-2 మిషన్​ ల్యాండింగ్​లో విఫలమైనప్పటికీ... ఇతర లక్ష్యాలను చేరుకుందని పేర్కొన్నారు.

జాబిల్లి ఉపరితలంపై చంద్రయాన్-2​ ఆర్బిటర్​ ఒక ఏడాది పాటు మాత్రమే పని చేస్తుందని తొలుత ఉహించినా.. ఏడేళ్ల పాటు అది సేవలు అందించగలదని భారత అంతరిక్ష పరిశోధన(ఇస్రో) విశ్వసిస్తోందని లోక్​సభలో కేంద్ర మంత్రి జితేంద్ర సింగ్​ తెలిపారు. సాంకేతికపరంగా చంద్రయాన్​-2 మిషన్​ అత్యంత క్లిష్టమైన ప్రయోగం అని పేర్కొన్నారు. ఈ మేరకు చంద్రయాన్​-2 ప్రయోగానికి సంబంధించి లోక్​సభలో అడిగిన ప్రశ్నకు ఆయన లిఖిత పూర్వక సమాధానం ఇచ్చారు.

" నిర్దేశిత ప్రదేశంలో చంద్రయాన్​-2 మృదువుగా ల్యాండింగ్ కాకపోయినప్పటికీ.. ఇతర లక్ష్యాలను ఈ ప్రయోగం గణనీయంగా సాధించింది. మొదట్లో చంద్రయాన్​ ఆర్బిటర్​ ఒక ఏడాది మాత్రమే పని చేస్తుందని ఊహించినా.. అది ఏడు సంవత్సరాలు సేవలు అందిస్తుందని ఆశిస్తున్నాము."

-జితేంద్ర సింగ్​, కేంద్ర మంత్రి

2019 జులై 22న ఆంధ్రప్రదేశ్​లోని సతీశ్​ ధావన్​ అంతరిక్ష కేంద్రం నుంచి చంద్రయాన్​-2ను ప్రయోగించింది ఇస్రో. చంద్రుడి దక్షిణ ధ్రువ విశేషాలను కనుగొడమే లక్ష్యంగా ఇస్రో చంద్రయాన్‌-2 మిషన్‌ను చేపట్టింది. ఇందులో భాగంగా ప్రయోగ చివరి నిమిషంలో సాంకేతిక కారణాలతో చంద్రుడి ఉపరితలాన్ని ల్యాండర్​ గట్టిగా ఢీకొనగా సంబంధాలు తెగిపోయాయి. అయినప్పటికీ ఆర్బిటర్ సమాచారాన్ని పంపుతోంది.

ఇదీ చూడండి:చంద్రయాన్​-3 ప్రయోగం 2022కు వాయిదా!