ఆక్సిజన్​ వినియోగంపై కేంద్రం కీలక ఆదేశాలు

దేశంలో కొవిడ్​ కల్లోలం కొనసాగుతున్న తరుణంలో వైద్య రంగం కోసం కాకుండా.. మరే ఇతర పరిశ్రమల్లో ద్రవ ఆక్సిజన్​ను వినియోగించకూడదని కేంద్రం స్పష్టం చేసింది. అన్నిరాష్ట్రాలు ఆక్సిజన్ వాడకంపై దృష్టిసారించాలని ఆదేశించింది.

కొవిడ్​ కేసులు పెరుగుతున్న నేపథ్యంలో.. వైద్యం కోసం కాకుండా మరే ఇతర రంగాల్లోనూ ద్రవరూప ఆక్సిజన్​ను వినియోగించకూడదని కేంద్రం.. ఆదేశించింది. ఆక్సిజన్​ తయారీ ప్లాంట్లు గరిష్ఠ స్థాయిలో ప్రాణవాయువును ఉత్పత్తి చేసి, తక్షణమే వైద్య వినియోగం కోసం అందజేయాలని తెలిపింది. దిల్లీ సహా అనేక రాష్ట్రాల్లో మెడికల్​ ఆక్సిజన్ కొరత వేధిస్తున్న తరుణంలో ఆక్సిజన్​ సరఫరాపై అధికారులతో కేంద్ర హోం శాఖ కార్యదర్శి అజయ్​ భల్లా.. సమీక్ష నిర్వహించారు.

"వైద్యం మినహా మరే ఇతర రంగాల్లోనూ ద్రవరూప ఆక్సిజన్​ వినియోగించకుండా రాష్ట్ర ప్రభుత్వాలు, కేంద్ర పాలిత ప్రాంతాలు చర్యలు తీసుకోవాలి. కొవిడ్​ ఉద్ధృతి కొనసాగుతున్న తరుణంలో అన్ని ఆక్సిజన్ తయారీ ప్లాంట్లు ప్రాణవాయువు ఉత్పత్తిని గరిష్ఠ స్థాయిలో పెంచాలి. అనంతరం ఆ ఆక్సిజన్​ను వైద్య రంగం కోసం వినియోగించేలా.. ప్రభుత్వానికి తక్షణమే అందజేయాలి."

- అజయ్​ భల్లా, కేంద్ర హోం శాఖ కార్యదర్శి

ఆక్సిజన్​ సరఫరాలో ఎలాంటి ఆటంకం లేకుండా చర్యలు చేపట్టామని అజయ్​ భల్లా తెలిపారు. తదుపరి ఆదేశాలు వచ్చే వరకు ఆక్సిజన్​ వాడకంపై తాజా.. ఆంక్షలు కొనసాగుతాయని పేర్కొన్నారు.

ఇదీ చూడండి:'కేంద్రం విధానం వల్ల.. వారికి రూ.లక్ష కోట్లు లాభం'

ఇదీ చూడండి:ఆక్సిజన్​ కొరతతో ముగ్గురు కరోనా రోగులు మృతి