'మృతుల గౌరవం కాపాడేందుకు కొత్త చట్టం!'

మరణించిన వారి గౌరవ ప్రతిష్ఠలు కాపాడేలా కొత్త చట్టం తీసుకురావాలని కేంద్ర, రాష్ట్ర సర్కార్లకు జాతీయ మానవ హక్కుల సంఘం సూచించింది. సామూహిక అంత్యక్రియలు జరగకుండా నివారించాలని పేర్కొంది.

కరోనా మృతులకు అంతిమ సంస్కారాల నిర్వహణ విషయంలో అవమానకరమైన ఘటనలు వెలుగుచూస్తున్న వేళ.. కేంద్రానికి కీలక సూచనలు చేసింది జాతీయ మానవ హక్కుల సంఘం(ఎన్​హెచ్​ఆర్​సీ). మరణించిన వారి గౌరవ ప్రతిష్ఠలు కాపాడేలా కొత్త చట్టం తీసుకురావాలని కేంద్ర, రాష్ట్ర సర్కార్లకు సూచించింది.

ఈ మేరకు అనేక ప్రతిపాదనలు చేసిన ఎన్​హెచ్​ఆర్​సీ.. సామూహిక అంత్యక్రియలు జరగకుండా నివారించాలని పేర్కొంది. సామూహిక ఖననాలు.. మరణించిన వారి గౌరవాన్ని దిగజార్చుతాయని అభిప్రాయపడింది.

బిల్లులు చెల్లించలేదని మృతదేహాలను ప్రైవేటు ఆస్పత్రి యాజమాన్యాలు అట్టిపెట్టుకోకుండా చూడాలని, గుర్తు తెలియని మృతదేహాలను జాగ్రత్తగా భద్రపరచాలని ఎన్​హెచ్​ఆర్​సీ స్పష్టం చేసింది. బిహార్‌, ఉత్తర్‌ప్రదేశ్​లోని గంగా నదిలో మృతదేహాలు తేలడంపై ఆ రాష్ట్రాలతో పాటు కేంద్రానికి కూడా నోటీసులు జారీ చేసింది. ఎవరైనా మరణించినట్లు గుర్తిస్తే ప్రభుత్వ సంస్థలకు విధిగా సమాచారం ఇవ్వాలని పౌరులకు సూచించింది.

ఇదీ చూడండి:మంకీ మాస్క్​తో కరోనాపై అవగాహన