నందిగ్రామ్ ప్రచారంలో బంగాల్ సీఎం, టీఎంసీ అధినేత్రి మమతా బెనర్జీ కాలికి గాయమైన నేపథ్యంలో ఆమె భద్రతను పర్యవేక్షిస్తున్న పోలీసులపై కేంద్ర ఎన్నికల సంఘం చర్యలు తీసుకునే అవకాశం ఉందని సీనియర్ అధికారి ఒకరు తెలిపారు. అయితే.. పోలీసులపై చర్యలు తీసుకునేందుకు రాష్ట్ర ప్రభుత్వం, అసెంబ్లీ ఎన్నికల పరిశీలకులు ఇద్దరు ఇవ్వాల్సిన నివేదికల కోసం వేచి చూస్తున్నట్లు చెప్పారు.
" ముఖ్యమంత్రి భద్రతా బృందం విఫలమవటం వల్లే ఈ సంఘటన జరిగింది. సీఎం చుట్టూ భద్రతా సర్కిల్లోకి ఎవరూ వెళ్లకూడదు. ఈసీఐ స్వాధీనం చేసుకున్న సీసీటీవీ ఫుటేజ్లో పలువురు సీఎం వాహనానికి అతి సమీపంలోకి వెళ్లినట్లు స్పష్టమవుతోంది. అలా జరిగి ఉండకూడదు. ఇది తీవ్రంగా పరిగణించాల్సిన భద్రతా ఉల్లంఘన. చర్యలపై నిర్ణయం తీసుకునేందుకు రాష్ట్ర ప్రభుత్వం, ఎన్నికల అధికారుల నివేదికల కోసం వేచి చూస్తున్నాం. "
- ఎన్నికల సంఘం సీనియర్ అధికారి
వీడియోలో మమతపై దాడి జరిగినట్లు స్పష్టంగా కనిపించలేదని, నివేదికలు వచ్చాక పూర్తి వివరాలు తెలుస్తాయన్నారు ఆ అధికారి.
దాడి వెనక ఉన్నదెవరో ఈసీ కనిపెట్టాలి: టీఎంసీ
నందిగ్రామ్లో ఎన్నికల ప్రచారం సందర్భంగా ముఖ్యమంత్రి మమతా బెనర్జీపై జరిగిన దాడి వెనక ఉన్న వారెవరో ఎన్నికల సంఘం తేల్చాలని డిమాండ్ చేశారు టీఎంసీ ప్రధాన కార్యదర్శి పార్థ ఛటర్జీ. మమతకు ఉన్న ప్రజాదరణపై భయంతోనే ఈ దాడికి పాల్పడ్డారని ఆరోపించారు. ప్రధాని నరేంద్ర మోదీ, కేంద్ర హోంమంత్రి అమిత్ షా, భాజపా అధ్యక్షుడు నడ్డాకు.. మమత ఆరోగ్యం గురించి తెలుసుకోవాలన్న కనీస ఆలోచన లేదని విమర్శించారు.
టీఎంసీ నిశ్శబ్ద నిరసనలు..
మమతా బెనర్జీ కాలికి గాయమైన ఘటనను నిరసిస్తూ తృణమూల్ కాంగ్రెస్ పార్టీ శ్రేణులు రాష్ట్రవ్యాప్తంగా నిశ్శబ్ద ర్యాలీలు చేపట్టాయి. రాష్ట్ర మంత్రులు, ఎమ్మెల్యేలు, పార్టీ సీనియర్ నేతలు ఈ నిరసనలకు నేతృత్వం వహించారు. నల్ల వస్త్రాలను నోటికి కట్టుకుని, ధిక్కారం అని రాసి ఉన్న ప్లకార్డులను మెడలో వేసుకుని ర్యాలీల్లో పాల్గొన్నారు.
హైకోర్టులో పిల్..
మమతా బెనర్జీ కాలికి గాయమైన ఘటనపై సీబీఐ దర్యాప్తు చేపట్టాలని కోరుతూ కోల్కతా హైకోర్టును ఆశ్రయించారు టీఎంసీ నేత సుల్జిత్ సాహా. ఈ వ్యాజ్యంపై వచ్చే శుక్రవారం విచారణ జరపనుంది హైకోర్టు.
ఇదీ చూడండి:ఆర్ఎస్ఎస్, భాజపా మధ్య దూరం పెరిగిందా?
