భారత్-చైనా మధ్య ద్వైపాక్షిక సంబంధాలు మెరుగుపడేందుకు ఎనిమిది సూత్రాలను పాటించాలని విదేశాంగ మంత్రి జై శంకర్ అన్నారు. ఇరు దేశాల ప్రయోజనాలకు విలువ ఇవ్వడం, ఏకపక్ష నిర్ణయాలు తీసుకోకపోవడం, పరస్పరం గౌరవించుకోవడం వంటివి ఉద్రిక్తతలను తగ్గించే అంశాలని తెలిపారు. లద్దాఖ్ ఘటన అనంతరం సరిహద్దుల్లో చైనా తమ బలగాలను మోహరించడాన్ని ఉద్దేశిస్తూ ఈ వ్యాఖ్యలు చేశారు. 13వ ఆల్ ఇండియా కాన్ఫరెన్స్ ఆఫ్ చైనా స్టడీస్ కార్యక్రమంలో వర్చువల్గా పాల్గొన్న విదేశాంగ మంత్రి ఈ విధంగా మాట్లాడారు.
సరిహద్దు ఉద్రిక్తతల ప్రభావం ఇరుదేశాలకే పరిమితం కాదన్న జైశంకర్‌... ప్రపంచ దేశాలపైనా ఉంటుందని అభిప్రాయపడ్డారు. దశల వారీగా సైన్యాన్ని ఉపసంహరించుకోవాలని కోరారు. ఉద్రిక్తతలపై చైనా అవలంబించబోయే వైఖరిపై... ఆ దేశం నుంచి ఎలాంటి నమ్మదగ్గ వివరణ రాలేదని తెలిపారు.
8 సూత్రాలివే...
- ఇప్పటికే కుదిరిన ఒప్పందాల పట్ల ఇరుదేశాలు నిబద్ధతతో ఉండాలి.
- వాస్తవాధీన రేఖ వద్ద నిబంధనలను ఉల్లంఘించి యథాతథ స్థితిని మార్చే ప్రయత్నాలు చేయకూడదు.
- సరిహద్దుల్లో శాంతియుత పరిస్థితుల్ని నెలకొల్పడం ద్వారా రెండు దేశాల మధ్య వివిధ రంగాల అభివృద్ధి ఒప్పందాలు కుదురుతాయి.
- బహుపాక్షిక ప్రపంచ నియమాలను అంగీకరిస్తోన్న భారత్-చైనా... ఆసియాలో నిర్మాణాత్మక శక్తిగా ఎదగాలి.
- ప్రతి దేశానికి భిన్నమైన ప్రయోజనాలు, ప్రాధాన్యాలు ఉంటాయి. కానీ, అవి ఏకపక్ష నిర్ణయాలు తీసుకోకూడదు.
- శక్తిమంతమైన దేశాలుగా ఎదిగే క్రమంలో ప్రతి దేశానికి భిన్నమైన లక్ష్యాలుంటాయి. అందుకోసం వారు చేసే పనులను కాదనలేం.
- ఇరు దేశాల మధ్య విబేధాలు ఎన్నైనా ఉండొచ్చు కానీ, అవి పరిష్కరించుకుంటూ ముందుకెళ్లడం ముఖ్యం.
- చైనా, భారత్ లాంటి దేశాలు దీర్ఘకాలిక ఆలోచనా ధృక్పథంతో ముందుకెళ్లాలి.
ఈ ఎనిమిది నియమాలను సరిగ్గా అనుసరిస్తే ఇరు దేశాల మధ్య ద్వైపాక్షిక సంబంధాలు మెరుగవుతాయని జై శంకర్ అన్నారు. సరిహద్దు వివాదంపై చర్చలు ఇంకా జరుగుతున్నట్లు గుర్తుచేశారు.
ఇదీ చదవండి:'దేశంలో కరోనా గ్రాఫ్ తగ్గుముఖానికి ఇదే నిదర్శనం'
