ఝార్ఖండ్ ధన్బాద్లో ఘోర ప్రమాదం జరిగింది. నిర్మాణంలో ఉన్న రైల్వే అండర్పాస్ కూలిపోయింది. ఈ ఘటనలో నలుగురు మరణించగా.. మరో ఇద్దరికి గాయాలయ్యాయి. ప్రధాన్ఖంత రైల్వే స్టేషన్ సమీపంలోని ఛతకులి గ్రామంలో అర్ధరాత్రి ఈ ప్రమాదం జరిగింది. సమాచారం అందుకున్న రైల్వేశాఖ అధికారులు, పోలీసులు ఘటనా స్థలానికి చేరుకుని సహాయక చర్యలు చేపట్టారు.
గ్రామస్థుల కథనం ప్రకారం.. ఈ అండర్పాస్ నిర్మాణం రాత్రి సమయంలో జరుగుతోంది. ఈ క్రమంలోనే పట్టాలపై నుంచి ఓ గూడ్స్ రైలు రావడం వల్ల భూమి కుంగిపోయింది. దీంతో నిర్మాణంలో ఉన్న అండర్పాస్ ఒక్కసారిగా కూలిపోయింది. నిర్మాణ సమయంలో పదిమంది కార్మికులు ఉండగా.. వీరిలో ఆరుగురు శిథిలాల కింద చిక్కుకున్నారు. మరో నలుగురు బయటపడ్డారు. మృతులను నిరంజన్ మహతో, పప్పుకుమార్, విక్రమ్ కుమార్, సౌరభ్ కుమార్గా గుర్తించారు.
ఈ ప్రమాదంపై సమాచారం అందుకున్న రైల్వే అధికారులు హుటాహుటిన ఘటనా స్థలానికి చేరుకున్నారు. మృతుల కుటుంబాలకు రూ.10 లక్షలు, క్షతగాత్రులకు రూ.50వేలు పరిహారాన్ని రైల్వేశాఖ ప్రకటించింది. ఈ ఘటనపై విచారణ చేపట్టేందుకు కమిటీని సైతం నియమించింది. ఈ ప్రమాదానికి కారణమైన వారిపై కఠిన చర్యలు తీసుకుంటామని సీనియర్ డీసీఎం అఖిలేశ్ పాండే తెలిపారు. ఘటనా స్థలానికి పెద్ద ఎత్తున గ్రామస్థులు చేరుకున్నారు. నిర్మాణ సంస్థ కార్మికులకు హెల్మెట్లు, షూ ఇవ్వలేదని, సరైన రక్షణ చర్యలు చేపట్టలేదని ఆరోపించారు.