తమిళనాడులో కడలూరు జిల్లాలో విషాదం నెలకొంది. డిసెంబరు 31న రాత్రి నూతన సంవత్సరం వేడుకల్లో ఓ వ్యక్తి పాముకాటుతో మరణించాడు. అతడితో పాటు ఉన్న మరో వ్యక్తికి కూడా పాము కాటేయగా.. ప్రస్తుతం ఆస్పత్రిలో చికిత్స పొందుతున్నాడు.
అసలేం జరిగిందంటే?
స్థానికుల సమాచారం ప్రకారం.. నూతన సంవత్సర వేడుకలలో మణికందన్ అలియాస్ పప్పు అనే వ్యక్తి పాల్గొన్నాడు. మద్యం ఫూటుగా సేవించి వచ్చాడు. ఆ సమయంలో అటుగా వెళ్తున్న ఓ పామును చూసి పట్టుకున్నాడు. తర్వాత ఆ సర్పాన్ని న్యూ ఇయర్ గిఫ్ట్ అని తన స్నేహితులకు చూపించి అరిచాడు. అది చూసిన వారంతా భయంతో అక్కడి నుంచి పరుగులు తీశారు.
అయితే రెప్పపాటులో ఆ పాము మణికందన్ను కాటేసింది. వెంటనే అతడు స్పృహ తప్పి పడిపోయాడు. అపస్మారక స్థితిలో ఉన్న మణికందన్ను ప్రభుత్వ ఆసుపత్రికి తరలించగా.. మార్గమధ్యలోనే మృతి చెందాడు. మణికందన్తో పాటు వచ్చిన మరో వ్యక్తి కపిలన్ను కూడా ఆ పాము కాటేసింది. ప్రస్తుతం అతడు ఆసుపత్రిలో చికిత్స పొందుతున్నాడు. కాటేసిన పామును స్థానికులు ఆస్పత్రికి తీసుకెళ్లగా.. అది రసెల్ జాతి సర్పం అని వైద్యులు తెలిపారు.
