జీఎస్​టీ చెల్లించొద్దని వ్యాపారులకు 'మోదీ' సలహా!

జీఎస్​టీ చెల్లింపులకు సంచలన వ్యాఖ్యలు చేశారు ప్రధాని మోదీ సోదరుడు ప్రహ్లాద్​ మోదీ. జీఎస్​టీ చెల్లించొద్దని మహారాష్ట్ర వ్యాపారులకు సూచించారు. ఆయన వ్యాఖ్యలు రాజకీయంగా దుమారం చెలరేగేలా చేస్తున్నాయి.

• 'మహారాష్ట్రలోని వ్యాపారులు కేంద్ర, రాష్ట్రాలు విధించిన జీఎస్​టీని చెల్లించొద్దు. ఆ తర్వాత చూడండి, ముఖ్యమంత్రి ఉద్ధవ్​ ఠాక్రేనే కాదు, ప్రధానమంత్రి నరేంద్ర మోదీ సైతం మీ ముందుకు వస్తారు.'ఈ మాటలు అన్నది స్వయానా.. ప్రధానమంత్రి నరేంద్ర మోదీ సోదరుడు ప్రహ్లాద్​ మోదీనే.

మహారాష్ట్ర ఉల్హాస్​నగర్​లో జరిగిన వ్యాపారుల సంఘం సమావేశంలో ఈ మేరకు జీఎస్​టీ చెల్లించొద్దని తోటి వ్యాపారులకు సూచించటం గమనార్హం. ప్రహ్లాద్​ మోదీ.. ప్రస్తుతం ఆల్ ఇండియా ఫెయిర్​ ప్రైస్​ షాప్​ అసోసియేషన్​కు అధ్యక్షుడిగా ఉన్నారు.

రాజీవ్​ గాంధీపై విమర్శలు..

భారత దివంగత ప్రధానమంత్రి రాజీవ్​ గాంధీపై విమర్శలు గుప్పించారు ప్రహ్లాద్​ మోదీ. అంతర్జాతీయ మార్కెట్లకు అనుగుణంగా.. చమురు ధరల పెరుగుదల అనేది రాజీవ్​ గాంధీ హయాంలోనే ప్రారంభమైందన్నారు. అందుకే.. బహిరంగ మార్కెట్​ ప్రకారం వ్యాపారం చేయాలనుకుంటే దానిని భరించాల్సిందేనన్నారు.

వ్యాపారులపై దాడులను అరికట్టాలి..

కేంద్రానికి తమ డిమాండ్లను తెలియజేసేందు కోసం ప్రహ్లాద్​ మోదీని ఈ సమావేశానికి ఆహ్వానించామని ట్రేడ్​ అసోసియేషన్​ తెలిపింది. లాక్​డౌన్​ సమయంలో మహమ్మారుల నిర్మూలన చట్టం నిబంధనలు ఉల్లంఘించారనే కేసుల్లో చాలా మంది ఉల్హాస్​నగర్​ వ్యాపారులు ఉన్నారని, ఇతర రాష్ట్రాలు ఆ కేసులను రద్దు చేయాని గుర్తు చేశారు. మహారాష్ట్ర సైతం కేసులను కొట్టివేయాలనేది తమ ప్రధాన డిమాండ్​గా పేర్కొన్నారు.

ఇదీ చూడండి:ఫ్లైట్​లో వచ్చి బైక్​ల చోరీ- ఓఎల్​ఎక్స్​లో దందా!