మహారాష్ట్రలోని కొల్హాపుర్లో యువవైద్యురాలి అనుమానాస్పద మృతి కలకలం రేపింది. తల్లిదండ్రుల ఫిర్యాదు మేరకు కేసు నమోదు చేసుకున్న పోలీసులు దర్యాప్తు చేపడుతున్నారు. వైద్యురాలి మృతదేహానికి ఇంజెక్షన్ గుచ్చి ఉండడం వల్ల పోలీసులు అనుమానం వ్యక్తం చేస్తున్నారు. ఓవర్డోస్ ఇంజెక్షన్ తీసుకుని ఆత్మహత్యకు పాల్పడినట్లు పోలీసులు భావిస్తున్నారు.
పోలీసుల వివరాలు ప్రకారం.. కొల్హాపుర్కు చెందిన గైనకాలజిస్ట్ డా. ప్రవీణ్ చంద్ర హెంద్రే కుమార్తె డా.అపూర్వ హెంద్రే(30).. స్థానికంగా ఉన్న ఓ ఆసుపత్రిలో ప్రాక్టీస్ చేస్తోంది. శనివారం రాత్రి ఆమె ఓ కార్యక్రమానికి హజరై కాస్త ఆలస్యంగా ఇంటికి చేరుకుంది. అనంతరం కాసేపటికే మళ్లీ బయటకు వెళ్లింది. కానీ ఈ సారి వెళ్లేటప్పుడు ఇంటి తలుపులకు బయట నుంచి తాళం వేసుకుని వెళ్లింది. వెంటనే గమనించిన తల్లిదండ్రులు.. పెరటి ద్వారం ద్వారా బయటకు వచ్చి రాత్రంతా ఆమె కోసం వెతికారు. ఎక్కడా ఆమె ఆచూకీ లభించలేదు.
చేసేదేం లేక ఆదివారం ఉదయం.. అపూర్వ తండ్రి పోలీసులకు ఫిర్యాదు చేయడానికి బయలుదేరాడు. ఈ లోపల ఆయనకు ఓ కాల్ వచ్చింది. ' మీ కుమార్తె నడిరోడ్డుపై విగతజీవిగా పడి ఉంది' అని ఎవరో ఫోన్లో చెప్పారు. వెంటనే అతడు పోలీసుల దగ్గరకు వెళ్లి విషయాన్ని చెప్పి.. వారితో ఘటనాస్థలికి చేరుకున్నాడు. ఆ సమయంలో ఆమె చేతికి ఇంజెక్షన్ గుచ్చి ఉంది. వెంటనే ఆమెను స్థానికంగా ఉన్న సీపీఆర్ ఆసుపత్రికి తరలించగా.. అప్పటికే మృతి చెందినట్లు వైద్యులు నిర్ధరించారు. దాంతోపాటు అపూర్వ హ్యాండ్బాగ్లో మెడిసిన్ బాటిల్, మరో రెండు ఇంజెక్షన్లు కూడా లభ్యమవ్వడం వల్ల పోలీసులు వాటిని స్వాధీనం చేసుకున్నారు.