దీపావళి టపాసులు - మరి, ఈ జాగ్రత్తలు పాటిస్తున్నారా?

Diwali Precautions In Telugu 2023 : అమావాస్య రోజున చీకటి తొలగించి.. వెలుగులు నింపే పండుగ దీపావళి. ఈ పండుగను దేశవ్యాప్తంగా కులమతాలకు అతీతంగా చిన్న పిల్లల నుంచి పెద్దల వరకు అందరూ ఎంతో సంతోషంగా జరుపుకుంటారు. పండగ సందర్భంగా చిన్నపిల్లలు, పెద్దలందరూ ఎంతో జాగ్రత్తగా బాణసంచాను కాల్చాలి. ఏమాత్రం నిర్లక్ష్యం వహించిన జీవితాంతాం అమావాస్యగా మారే ప్రమాదం ఉంది. కాబట్టీ, పండగ సమయంలో ఎటువంటి జాగ్రత్తలను తీసుకోవాలో ఈ స్టోరీలో చూద్దాం.

Diwali Precautions In Telugu 2023 :దీపావళి రోజున ఎటు చూసినా.. రంగు రంగుల విద్యుత్‌ దీపాలతో అలంకరించిన భవనాలు, ఆ ఇళ్ల ముందు వెలిగించిన దీపాలుకనిపిస్తుంటాయి. ఇంటిల్లిపాది ఆనందోత్సాహాలతో జరుపుకునే ఈ పండగ కోసం ప్రతిఒక్కరూ వేయి కళ్లతో ఎదురు చూస్తుంటారు. పగటిపూట భక్తిశ్రద్ధలతో లక్ష్మీదేవిని పూజించటం.. మిఠాయిలతో నోరు తీపి చేసుకోవడం.. వంటి కార్యక్రమాలతో గడిచిపోతుంది. ఇక సాయంత్రం అయ్యిందంటే.. అసలు సందడి మొదలవుతుంది. టపాసుల మోతలతో ఊరూవాడా దద్దరిల్లిపోతాయి. ఈ సంబరాల్లో పిల్లల నుంచి పెద్దల వరకు అందరూ పాల్గొంటారు. అయితే.. ఈ సమయంలో తప్పక కొన్ని జాగ్రత్తలు పాటించాల్సి ఉంటుంది. అవేంటో ఈ స్టోరీలో తెలుసుకుందాం.

బాణసంచా కాల్చే సమయంలో తీసుకోవాల్సిన జాగ్రత్తలు..

• కొవిడ్‌ తరువాత ప్రతి ఒక్కరి ఇంట్లో సానిటైజర్‌లు ఉంటున్నాయి. అయితే.. టపాసులను కాల్చే ముందు ఎట్టి పరిస్థితుల్లోనూ చేతులకు సానిటైజర్‌ను రాసుకోకూడదు. ఇందులో ఉండే ఆల్కాహాల్‌ చేతులకు మంటను అంటుకునేలా చేస్తుంది.
• టాపాసుల కార్యక్రమానికి సిద్ధం కావడానికి ముందుగానే.. ఒక బకెట్ నీళ్లను సిద్ధం చేసుకోవాలి. అనుకోకుండా మంటలు వ్యాపించినప్పుడు వాటిని ఆర్పేందుకు నీళ్లు అందుబాటులో ఉంటాయి.
• ఇంటి ముందు టాపాసులను కాల్చే సమయంలో పిల్లలను ఓ కంట కనిపెడుతుండాలి. పెద్దల సమక్షంలోనే పిల్లలు బాణసంచాను కాల్చేలా చూడాలి.
• టాపాసులను కాల్చే వారు కాటన్‌ దుస్తులను ధరించడం మేలు. చుడీదార్లను ధరించేవారు వదులుగా ఉన్నవి కాకుండా బిగుతుగా ఉండేవి వేసుకోవాలి.
• రాకెట్‌ బాంబులు, తారాజువ్వలను కాల్చే సమయంలో ఇంటి తలుపులు, కిటికీలను పూర్తిగా మూసివేయండి. ఇవి కిటికీల్లో నుంచి లోపలికి వచ్చే ప్రమాదం ఉంటుంది.
• ఇంటి లోపల, వరండాలో బాంబులను పేల్చవద్దు. వాటి నుంచి వెలువడే శబ్దం, పొగతో వినికిడి, శ్వాసకోస సమస్యలు వస్తాయి.
• టాపాసులను చేతులతో పట్టుకొని కాల్చొద్దు. ఇంకా.. కొన్ని పేలకుండా కాసేపు అలా ఉండిపోతాయి. పేలలేదని దగ్గరకు వెళ్లి చూడవద్దు. అవి అనూహ్యంగా పేలితే గాయాలయ్యే అవకాశం ఉంటుంది.
• వస్త్ర దుకాణాలు, వ్యాపారులు, కార్యాలయాల్లో పూజలు చేసే వారు లక్ష్మీదేవి, కుబేర పూజలు చేయడం ఆనవాయితీ. పూజలో వెలిగించే దీపాలను తక్కువ నూనెతో నింపాలి. జ్యోతులు వెలుగుతున్న సమయంలో అక్కడే ఉండాలి.
• పర్యావరణానికి హాని చేయని గ్రీన్‌ క్రాకర్స్‌ అందుబాటులోకి వచ్చాయి. వాటిని ఉపయోగించడం ఉత్తమం.
• బాణసంచాను కాల్చే సమయంలో చెప్పులను వేసుకోవాలి. మద్యం సేవించి టాపాసులను కాల్చవద్దు. ఎందుకంటే మద్యం మత్తులో మెదడు సరైన నిర్ణయాలను తీసుకోదు. దీనివల్ల ప్రమాదాలు జరిగే అవకాశం ఉంటుంది.
• చర్మంపై నిప్పురవ్వలు పడినా, కాలిన గాయాలైనా వెంటనే వైద్యుల వద్దకు వెళ్లి చికిత్స తీసుకోవాలి. కాలిన గాయాలపై నీళ్లను వేయకండి. సొంత వైద్యం మంచిది కాదని గుర్తుంచుకోండి.
• గాలి బాగా వీచే సమయంలో టాపాసులను కాల్చడం మంచిది కాదు. గాలికి నిప్పురవ్వలు సమీపంలోని గుడిసెలు, గడ్డి వాములు, ఇళ్లపై పడి అగ్నిప్రమాదాలు జరుగుతాయి.