CJI Ramana: కోర్టులను అందరికీ అందుబాటులోకి తీసుకురావడంలో చాలా వెనుకబడి ఉన్నామని, తక్షణం ఈ సమస్యను తీర్చకపోతే రాజ్యాంగ సిద్ధాంతం విస్మరణకు గురవుతుందని భారత ప్రధాన న్యాయమూర్తి జస్టిస్ ఎన్.వి.రమణ పేర్కొన్నారు. శ్రీనగర్‌లో రూ.310 కోట్లతో 1.7 లక్షల చదరపు మీటర్ల వైశాల్యంతో నిర్మిస్తున్న జమ్మూకశ్మీర్‌-లద్దాఖ్ నూతన హైకోర్టు భవన నిర్మాణానికి ఆయన శనివారం శంకుస్థాపన చేశారు. అనంతరం అక్కడ నిర్వహించిన కార్యక్రమంలో ప్రసంగించారు. "ప్రజలు తమ హక్కులకు, గౌరవ మర్యాదలకు రక్షణ ఉన్నట్లు గుర్తించడం ఆరోగ్యకరమైన ప్రజాస్వామ్య పనితీరుకు అత్యవసరం. కేసుల వేగవంతమైన పరిష్కారమే ఆరోగ్యకరమైన ప్రజాస్వామ్య ప్రథమ లక్షణం. న్యాయాన్ని నిరాకరిస్తే అది అరాచకానికి దారితీస్తుంది. ప్రజలు చట్టవిరుద్ధమైన యంత్రాంగాల వైపు చూస్తారు. రాజ్యాంగం ప్రసాదించిన హక్కులు, ఆకాంక్షలకు రక్షణ కల్పించే అధికారం మన దేశంలో కోర్టులకు ఉంది" అని ఆయన చెప్పారు.
అండగా ఆధునిక సాంకేతికత: "భారత్‌లో న్యాయం అందజేసే వ్యవస్థ (జస్టిస్ డెలివరీ మెకానిజం) చాలా సంక్లిష్టమైనది. ఖరీదైంది కూడా. ప్రస్తుత ఆధునిక సాంకేతికత.. న్యాయవ్యవస్థకు అండగా నిలుస్తోంది. వీడియో కాన్ఫరెన్సింగ్‌ ద్వారా నిర్వహించే విచారణలు సమయాన్ని, దూరాన్ని, ఖర్చును తగ్గిస్తున్నాయి. దేశంలో ఇప్పటికీ విస్తృతమైన సాంకేతిక అగాధం నెలకొన్న నేపథ్యంలో దాన్ని పూడ్చడానికి వినూత్న విధానాలను అనుసరించాలి. న్యాయవ్యవస్థలో మౌలిక వసతుల లోటును భర్తీ చేయడం నాకు అన్నింటికంటే ఇష్టం. ఈ వసతులు ఏమాత్రం సంతృప్తికరంగా లేవు. వాటి కల్పనకు నిరంతరం ప్రయత్నిస్తున్నా"