దిల్లీలో అత్యంత పాశవికమైన హత్య వెలుగులోకి వచ్చింది. ప్రియురాలిని చంపి, శవాన్ని ముక్కలు చేసి, ఫ్రిజ్లో దాచి పెట్టిన ఘటన షాక్కు గురిచేస్తోంది. మృతదేహం భాగాలను దిల్లీలోని వేర్వేరు ప్రాంతాల్లో పడేశాడు నిందితుడు. ఆరు నెలల క్రితం ఈ హత్య జరగగా.. తాజాగా ఈ కేసును ఛేదించారు పోలీసులు. నిందితుడిని అఫ్తాబ్ అమిన్ పూనావాలా(28)గా గుర్తించారు.
అఫ్తాబ్ ముంబయిలో నివాసం ఉండేవాడు. మృతురాలు శ్రద్ధా వాకర్(27) సైతం ముంబయిలోనే నివసించేది. నగరంలోని ఓ కాల్సెంటర్లో పనిచేస్తుండగా నిందితుడితో శ్రద్ధకు పరిచయం ఏర్పడింది. ఓ డేటింగ్ యాప్ ద్వారా ఇరువురూ దగ్గరయ్యారు. అనంతరం ఒకరినొకరు ప్రేమించుకున్నారు. ఒకేచోట కలిసి జీవించడం ప్రారంభించారు. మూడేళ్ల పాటు లివిన్-రిలేషన్షిప్ కొనసాగించిన ఇద్దరు.. వివాహం చేసుకోవాలని అనుకున్నారు. అయితే, వీరి పెళ్లికి ఇంట్లో పెద్దలెవరూ అంగీకరించలేదు. దీంతో దిల్లీకి మకాం మార్చారు. మెహ్‌రౌలీ ప్రాంతంలోని ఓ ఫ్లాట్లో దిగారు.
దిల్లీకి వచ్చిన తర్వాత శ్రద్ధ.. వివాహం చేసుకోవాలని అఫ్తాబ్పై ఒత్తిడి తెచ్చింది. ఇందుకు అఫ్తాబ్ అంగీకరించకపోవడం వల్ల ఇరువురి మధ్య తరచూ గొడవలు జరుగుతుండేవి. ఘర్షణ పడుతూ ఒక్కోసారి వీరిద్దరూ నియంత్రణ కోల్పోయేవారు. ఈ క్రమంలోనే అఫ్తాబ్ దారుణానికి ఒడిగట్టాడు. ప్రేమిస్తున్న యువతినే కడతేర్చాడు. గొడవ జరిగిన కోపంలో గొంతు నులిమి శ్రద్ధను హత్య చేశాడు. మే 18న ఈ ఘటన జరిగింది.
శవాన్ని ముక్కలు ముక్కలు చేసి..
అనంతరం, ఈ పాపం బయట పడకుండా చూసేందుకు తెగ ప్రయత్నాలు చేశాడు నిందితుడు. ఏకంగా శవాన్నే మాయం చేయాలని ఫిక్స్ అయ్యాడు. మృతదేహాన్ని ముక్కలు ముక్కలుగా నరికేశాడు. శవాన్ని మొత్తం 35 భాగాలు చేశాడు. అలాగే ఉంచితే డీకంపోజ్ అవుతాయని భావించాడు. దీంతో ఓ రిఫ్రిజిరేటర్ కొనుక్కొచ్చాడు. శవ భాగాలను అందులో భద్రపరిచాడు. ఆ తర్వాత 18రోజుల పాటు మృతదేహ భాగాలను దిల్లీలోని వివిధ ప్రాంతాల్లో పడేశాడు. అర్ధరాత్రుళ్లు బయటకు వెళ్లి శరీర విడిభాగాలను పడేసేవాడు అఫ్తాబ్.
నాలుగు నెలల వరకు దీనిపై ఎలాంటి విషయం బయటకు రాలేదు. అయితే, సెప్టెంబర్లో శ్రద్ధ స్నేహితురాలికి అనుమానం వచ్చింది. శ్రద్ధ మొబైల్ స్విచ్ఛాఫ్ వస్తోందని, అసలు కాంటాక్టులోకి రావడం లేదని బాధితురాలి కుటుంబ సభ్యులను సంప్రదించారు. కుటుంబ సభ్యులు.. శ్రద్ధ సోషల్ మీడియాను చెక్ చేయగా.. ఎలాంటి అప్డేట్స్ లేవని స్పష్టమైంది. దీంతో వారిలో ఆందోళన మొదలైంది. నవంబర్లో బాధితురాలి తండ్రి వికాశ్ మదన్ వాకర్ ముంబయి పోలీసులను ఆశ్రయించారు. స్టేషన్లో మిస్సింగ్ కంప్లైంట్ ఇచ్చారు. పోలీసులు దర్యాప్తు చేయగా.. బాధితురాలి చివరి లొకేషన్ దిల్లీ అని తెలిసింది. దీని ఆధారంగా కేసును దిల్లీకి బదిలీ చేశారు. అప్పుడే బాధితురాలి తండ్రి.. అఫ్తాబ్తో శ్రద్ధ రిలేషన్షిప్ గురించి పోలీసులకు చెప్పారు. తన కూతురు కనిపించకుండా పోవడానికి అతడే కారణమై ఉంటాడని అనుమానం వ్యక్తం చేశారు.
ఈ దర్యాప్తులోనే అఫ్తాబ్, శ్రద్ధ దిల్లీకి వచ్చి నివాసం ఉంటున్నట్లు తేలింది. అనంతరం నిందితుడిని గుర్తించి పట్టుకున్నారు పోలీసులు. అఫ్తాబ్ను ప్రశ్నించగా.. నేరం ఒప్పుకున్నాడు. వివాహానికి బలవంతం చేయడం వల్లే నేరానికి పాల్పడాల్సి వచ్చిందని చెప్పాడు. నిందితుడి ఫ్లాట్లో ఉన్న పలు ఎముకలను పోలీసులు స్వాధీనం చేసుకున్నారు. మిగతా శరీర భాగాల స్వాధీనం కోసం ప్రయత్నిస్తున్నారు.
ఫ్రిజ్లో ఉన్న ముఖాన్ని చూస్తూ..
పోలీసుల విచారణలో మరిన్ని సంచలన విషయాలు బయటపడ్డాయి. నిందితుడు.. యువతిని హత్య చేసిన గదిలోనే రోజూ నిద్రించేవాడని తేలింది. ఫ్రిజ్లో శరీర భాగాలు ఉంచి, పైన తల భాగాన్ని పేర్చాడని పోలీసులు వెల్లడించారు. రోజూ ఫ్రిజ్ తలుపులు తీసి శ్రద్ధ ముఖాన్ని చూసేవాడని చెప్పారు. శరీర భాగాలను బయటపడేసిన తర్వాత ఫ్రిజ్ను శుభ్రంగా కడిగాడని తెలిపారు.
ఆ పాత్ర స్ఫూర్తితో!
క్రైమ్ సినిమాలు చూసే ఈ హత్య చేసినట్లు నిందితుడు ఒప్పుకున్నాడు. డెక్స్టర్ సిరీస్ను స్ఫూర్తిగా తీసుకొని హత్య చేసినట్లు తెలిపాడు. ఆ అమెరికన్ క్రైమ్ డ్రామా సిరీస్లో కథానాయకుడు డెక్స్టర్ మోర్గన్.. ఫోరెన్సిక్ టెక్నీషియన్గా పనిచేస్తాడు. నేరాలకు సంబంధించి మియామీ పోలీసు శాఖకు సహకరిస్తుంటాడు. మరోవైపు, రహస్యంగా అనేక హత్యలు చేస్తుంటాడు. న్యాయవ్యవస్థ నుంచి తప్పించుకున్న నేరస్థులను ఎవరికీ తెలియకుండా చంపుతాడు. శవాలను ముక్కలు ముక్కలుగా నరికి అరేబియా సముద్రంలో పడేసి పోలీసులకు చిక్కకుండా జాగ్రత్తపడతాడు. ఈ సిరీస్తో పాటు అనేక క్రైమ్ సినిమాలు, వెబ్సిరీస్లు చూసి హత్య చేసినట్లు అఫ్తాబ్ ఒప్పుకున్నాడు.
