దేశ రాజధాని దిల్లీని చలి వణికిస్తోంది. నగరంలో శుక్రవారం ఉదయం ఉష్ణోగ్రతలు ఏకంగా 7.5 డిగ్రీలకు పడిపోయినట్లు భారత వాతావరణ శాఖ వెల్లడించింది. నవంబర్లో ఉష్ణోగ్రతలు ఈ స్థాయిలో పడిపోవడం గత 14 ఏళ్లలో ఇదే ప్రథమమని తెలిపింది. శనివారం వరకు ఉష్ణోగ్రతలు ఇలాగే ఉండొచ్చని అంచనా వేసింది. ఈ పరిస్థితి మరో 24 గంటలు కొనసాగితే కోల్డ్ వేవ్(శీతల గాలులు వీయడం) పరిస్థితిని ప్రకటించనున్నట్లు పేర్కొంది.
నవంబర్ నెలకు గాను దిల్లీలో అత్యల్ప ఉష్ణోగ్రతలు.. గత ఏడాది 11.5 డిగ్రీలు, 2018లో 10.5 డిగ్రీలు, 2017లో 7.6 డిగ్రీలుగా నమోదయ్యాయి.