విమానంలో అదీ అత్యంత ఖరీదైన బిజినెస్ క్లాస్‌లో ప్రయాణిస్తే ఎంతో పరిశుభ్రంగా, సౌకర్యంగా ఉంటుందని భావిస్తాం. కానీ అక్కడ చీమల దండు కనిపిస్తే.. ఆ కారణంగా విమానం మూడు గంటలు ఆలస్యంగా బయల్దేరితే ఎలా ఉంటుంది? తమకు ఇలాంటి అనుభవమే ఎదురైనట్లు ఎయిర్ ఇండియా (Air India Ants) విమాన ప్రయాణికులు కొందరు తెలిపారు.
దిల్లీ నుంచి లండన్కు వెళ్లే విమానం(Air India News) సోమవారం మధ్యాహ్నం 2 గంటలకు బయల్దేరాల్సి ఉండగా, టేకాఫ్‌ కావడానికి కాస్త ముందు బిజినెస్ క్లాస్‌లో చీమల బారు కనిపించిందని చెప్పారు. దీంతో మరో విమానాన్ని సిద్ధం చేసి అందులోకి ఎక్కించారని, ఈ తతంగం పూర్తయ్యేసరికి మూడు గంటలు పట్టిందని పేర్కొన్నారు.