'పరువు నష్టం కేసులో ప్రియా రమణి నిర్దోషి'

కేంద్ర మాజీ మంత్రి ఎంజే అక్బర్​ వేసిన పరువు నష్టం కేసులో.. జర్నలిస్టు ప్రియా రమణిని దిల్లీ కోర్టు నిర్దోషిగా ప్రకటించింది. మహిళలపై నేరాలకు పాల్పడటం సిగ్గుచేటు అని న్యాయస్థానం వ్యాఖ్యానించింది.

జర్నలిస్టు ప్రియా రమణిపై.. కేంద్ర మాజీ మంత్రి ఎంజే అక్బర్​ దాఖలు చేసిన పరువు నష్టం దావాను దిల్లీ కోర్టు కొట్టివేసింది. ఈ కేసులో ప్రియను నిర్దోషిగా ప్రకటిస్తూ తీర్పు వెలువరించింది.

మహిళకు దశాబ్దాల తర్వాతైనా.. తన బాధను వ్యక్తపరచడానికి, ఫిర్యాదు చేసేందుకు హక్కు ఉందని ఈ సందర్భంగా కోర్టు వ్యాఖ్యానించింది. రామాయణ, మహాభారతాల్లోనూ మహిళలను గౌరవించాలని ఉందని, అలాంటి దేశంలో మహిళలపై ఇలాంటి నేరాలకు పాల్పడటం సిగ్గు చేటు అని కోర్టు మండిపడింది.

మీ టూ ఆరోపణలు..

20 ఏళ్ల క్రితం అక్బర్​ జర్నలిస్టుగా ఉన్నప్పుడు.. తనపై లైంగిక వేధింపులకు పాల్పడ్డారని 2018లో ప్రియా రమణి ఆరోపించారు. మీ టూ సమయంలో.. అక్బర్​పై ఆరోపణలు చేసిన మొదటి మహిళ రమణినే కావడం గమనార్హం. ఈ కారణంగా.. ఆయన కేంద్ర మంత్రి పదవిని కోల్పోవాల్సి వచ్చింది.

ప్రియ ఆరోపణలను తోసిపుచ్చిన ఆయన.. ఆమెపై పరువు నష్టం దావా వేశారు. ఈ కేసులో తాజాగా దిల్లీ కోర్టు తీర్పు ఇచ్చింది.