మోదీ, అమిత్​షాకు వ్యతిరేకంగా పోస్టులు- కానిస్టేబుల్​పై వేటు

రైతుల ఆందోళనకు మద్దతుగా.. ప్రధాని మోదీ, కేంద్ర హోంమంత్రి అమితా షాకు వ్యతిరేకంగా పోస్టులు చేసిన ఓ కానిస్టేబుల్​ తన ఉద్యోగాన్ని కోల్పోయాడు. అతణ్ని అక్టోబరు 27 తన పైఅధికారులు ఉద్యోగం నుంచి తొలగించారు.

ప్రధానమంత్రి నరేంద్ర మోదీ, కేంద్ర హోంమంత్రి అమిత్ షాకు వ్యతిరేకంగా సామాజిక మాధ్యమాల్లో పోస్టులు చేసిన ఓ కానిస్టేబుల్​పై వేటు పడింది. అక్టోబరు 27న అతడిని తన పైఅధికారులు ఉద్యోగం నుంచి తొలగించారు.

ఎందుకు వేటు..?

ఉత్తర దిల్లీ జిల్లాలోని సబ్జి మండి ప్రాంతంలో కానిస్టేబుల్​గా విధులు నిర్వర్తించే మనీశ్​​ మీనా... రైతుల ఆందోళనకు మద్దతుగా అక్టోబరు 9న తన ఫేస్​బుక్​, ట్విట్టర్ ఖాతాల్లో పోస్టులు చేశారు. అందులో మోదీ, అమిత్ షాకు వ్యతిరేకంగా అభ్యంతరకరమైన వ్యాఖ్యలను రాశారు. "రైతు వ్యతిరేక వర్గాలకు చెందినవారు ప్రస్తుతం అధికారంలో ఉన్నారు. రైతుల ఉద్యమాన్ని అణచివేయడంలో విఫలమైన వాళ్లు.. ఇప్పుడు రైతులపై ఉక్కుపాదం మోపుతున్నారు. సోదరులారా, వాళ్లు నేర చరిత్రగలవారు. వాళ్లు మనుషులపై కార్లు ఎక్కిస్తారు" అని పేర్కొన్నారు.

కానిస్టేబుల్​ మనీశ్​ మీనా

మనీశ్​ పోస్టులపై దిల్లీ పోలీస్ కమిషనర్ రాకేశ్ ఆస్థానాకు ఫిర్యాదు అందింది. దాంతో ఈ కేసు దర్యాప్తును ఉత్తర దిల్లీ జిల్లా అదనపు డీసీపీ అనితా రాయ్​కు అప్పగించారు. దర్యాప్తులో మనీషాపై వచ్చిన ఆరోపణలు నిజమేనని అధికారులు గుర్తించారు. అనంతరం అతణ్ని పోలీసు శాఖ అధికారులు.. అక్టోబరు 27న ఉద్యోగం నుంచి తొలగించారు.

అయితే.. సదరు కానిస్టేబుల్ తన ట్విట్టర్, ఫేస్​బుక్​ ఖాతాలను డిలీట్ చేశారు. దీనిపై స్పందించేందుకు దిల్లీ పోలీసు శాఖ అధికారులు నిరాకరించారు. ఇది తమ శాఖలోని అంతర్గత వ్యవహారమని ఉత్తర దిల్లీ జిల్లా డీసీపీ సాగర్ సింగ్ కాల్సి పేర్కొన్నారు.

ఇదీ చూడండి:'మోదీ మళ్లీ పీఎం అవ్వాలంటే.. యోగి సీఎం కావాల్సిందే'

ఇదీ చూడండి:ఆర్యన్​ ఖాన్​ విడుదలకు 14 షరతులు- ఆ పనులు చేయకూడదు!