ఊపిరి ఉన్నా.. చనిపోయిందని వైద్యుల నిర్ధరణ!

ఛత్తీస్​గఢ్​ రాయ్​పుర్​లో ఓ బాధాకరమైన ఘటన చోటుచేసుకుంది. ఓ కొవిడ్​ రోగి బతికుండగానే.. మృతి చెందారని చెప్పారు వైద్యులు. అంత్యక్రియల కోసం మృతదేహాన్ని కుటుంబసభ్యులకు అందించారు. కానీ, అసలు విషయం తెలుసుకుని కుటుంబసభ్యులు ఆశ్చర్యపోయారు.

ఛత్తీస్​గఢ్​ రాయ్​పుర్​లో అనూహ్య ఘటన జరిగింది. 73 ఏళ్ల రోగి.. ప్రాణాలతో ఉన్నప్పటికీ చనిపోయినట్లు నిర్ధరణకు వచ్చారు రాయ్​పుర్​లోని అంబేడ్కర్ ఆస్పత్రి వైద్యులు. అంత్యక్రియలు చేసేందుకు ఆమెను తీసుకువెళ్లిన కుటుంబసభ్యులు.. అసలు విషయం తెలిసి విస్తుపోయారు.

ఇదీ జరిగింది...

73 ఏళ్ల లక్ష్మీభాయ్ అగర్వాల్​కు కొవిడ్​ సోకింది. వైద్యం కోసం ఈమె గత బుధవారం అంబేడ్కర్ ఆస్పత్రిలో చేరారు. అయితే.. వారం రోజుల తర్వాత బాధితురాలు మృతిచెందారని కుటుంబ సభ్యులకు సమాచారం అందించారు వైద్య సిబ్బంది. అనంతరం, లక్ష్మీభాయ్​ మృతదేహాన్ని కుటుంబ సభ్యులకు అందించారు.

అంత్యక్రియలు జరిపేందుకు లక్ష్మీభాయ్​ మృతదేహాన్ని తీసుకెళ్లిన కుటుంబీకులు.. ఆమె శ్వాస తీసుకుంటున్నట్లు గుర్తించారు. ప్రాణాలతో ఉన్న లక్ష్మీభాయ్​ని ఆస్పత్రికి తీసుకెళ్లేందుకు వెనుదిరిగారు. కానీ.. అంతలోనే ఆమె తుదిశ్వాస విడిచారు.

ఇది డాక్టర్ల నిర్లక్ష్యం వల్లే జరిగిందని వైద్యులపై ఆగ్రహం వ్యక్తం చేశారు లక్ష్మీభాయ్ కుటుంబ సభ్యులు.

ఇదీ చదవండి:'చస్తే మరీ మంచిది'- మంత్రి వివాదాస్పద వ్యాఖ్య