కోడల్ని అత్త రాచి రంపాలు పెట్టే సీన్ అన్ని పాత సినిమాల్లో కామనే! కానీ, ఈ ఇంట్లో మాత్రం సీన్ రివర్స్ అయింది. టీవీ సౌండ్ తగ్గించమని అడిగినందుకు అత్త చేతివేళ్లను విరిచేసింది ఓ కోడలు. ఈ మహారాష్ట్రలోని అంబర్నాథ్లో చోటు చేసుకుంది.
వివరాల్లోకి వెళితే..
వృశాలీ కులకర్ణీ అనే మహిళ తన కోడలు విజయ కులకర్ణీ ఎప్పటిలాగే ఇంట్లో ఉన్నారు. వృశాలీ పూజ చేసుకుంటూ మంత్రాలు జపించింది. అదే సమయంలో ఇంట్లో ఉన్న కోడలు విజయ టీవీ చేసుకుని చూస్తోంది. టీవీ సౌండ్.. పూజకు అంతరాయం కలిగిస్తోందని వెంటనే దాన్ని ఆపేయమని కోడలికి చెప్పింది.
కానీ, కోడలు ఆమె మాటలు పెడచెవిన పెట్టి వాల్యూమ్ ఇంకా పెంచింది. తన మాట వినలేదని ఆగ్రహించిన అత్త.. ఆ కోడలిని మందలించేందుకు వచ్చింది. వచ్చి టీవీని ఆపేసింది. అయితే, కోపంతో కోడలు రెచ్చిపోయింది. టీవీ ఆపిందని ఆమెపై చేయి చేసుకునేందుకు సిద్ధపడింది. అత్తను దుర్భాషలాడింది. అత్త సైతం తగ్గకపోవడం వల్ల.. వారి మధ్య వాగ్వాదం మరింత ముదిరింది. కొట్లాట సమయంలో అత్త వేలు చూపించి మాట్లాడిందని ఆమె వేలును విరిచేసింది కోడలు. ఆ గొడవ అంతటితో ఆగిపోలేదు. వారిద్దరూ గొడవ పడుతున్న సమయంలో కొడుకు సౌరభ్ రంగంలోకి దిగాడు. ఇద్దరికీ సర్ది చెబుదామని మధ్యలో దూరిన అతనికి సైతం దెబ్బల నుంచి విముక్తి కలగలేదు, తీవ్ర గాయాలతో అత్త.. శివాజీ నగర్ పోలీస్ స్టేషన్లో కోడలిపై ఫిర్యదు చేసింది.
వైద్య సిబ్బంది నిర్లక్ష్యానికి అద్దం పట్టేలా...
కర్ణాటకలోని కిలారాలో హృదయ విదారక ఘటన జరిగింది. కుటుంబ సభ్యులకు సమాచారం ఇవ్వకుండా ఆస్పత్రిలో చేరిన ఓ వ్యక్తి కాలును తొలగించారు వైద్యులు. అనంతరం కాలును పూడ్చేయాలని బాధితుడి భార్యకు చెప్పారు. ఈ ఘటనపై స్థానికులు ఆగ్రహం వ్యక్తం చేస్తున్నారు.
ఏమైందంటే?
గ్యాంగ్రీన్తో బాధపడుతున్న తన భర్త ప్రకాష్ను మండ్య వైద్య కళాశాల ఆసుపత్రిలో చేర్చింది భాగ్యమ్మ అనే మహిళ. అయితే ఆమె అడ్మిట్ చేసిన మూడు రోజుల తర్వాత తన భర్తకు ఆపరేషన్ చేసి ఆ కాలును తొలగించారు. శస్త్ర చికిత్స తర్వాత వైద్య సిబ్బంది తొలగించిన ఆ కాలిని భాగ్యమ్మకు అందజేశారు. విషయం అర్థం కాని భాగ్యమ్మ ఆ కాలును చూసి కన్నీరు పెట్టుకుంది. ఆ కాలిని ఎక్కడైనా పాతి పెట్టమని సిబ్బంది అన్నారని ఆమె వాపోయింది. కాలిని పూడ్చేందుకు వేల రూపాయలను డిమాండ్ చేశారని ఆమె ఆవేదన వ్యక్తం చేసింది. ఇదంతా ఉన్నతాధికారుల దృష్టికి వెళ్లగా.. ఈ విషయంపై కఠిన చర్య తీసుకుంటానని భరోసా ఇచ్చారు.