మహారాష్ట్రలో దారుణ ఘటన ఆలస్యంగా వెలుగులోకి వచ్చింది. క్షుద్రపూజల నెపంతో ఓ మహిళ తన కన్నకూతురిని హతమార్చినట్లు తెలుస్తోంది.
పోలీసులు తెలిపిన వివరాల ప్రకారం..ఔరంగాబాద్లోని వాలూజ్ ప్రాంతంలో నివాసం ఉండే సూర్యకాంత్ సెల్కే అనే వ్యక్తికి సొంతంగా కొన్ని ఇళ్లు ఉన్నాయి. అయితే అందులోని ఒక ఇంటిలో కాకాసాహెబ్ నామ్దేవ్ భూయ్గాడ్ అనే వ్యక్తి, అతడి భార్య, ఇద్దరు కుమార్తెలతో అద్దెకు ఉంటున్నాడు. కొన్ని నెలల క్రితం ఇంటి అద్దెను చెల్లించకుండా ఇల్లు ఖాళీ చేశాడు. దీంతో ఇంటి యజమాని సూర్యకాంత్ అద్దె కోసం కాకాసాహెబ్కు ఎన్నిసార్లు ఫోన్ చేసినా స్పందించలేదు. దీంతో అనుమానం వచ్చిన సూర్యకాంత్ డిసెంబర్ 14న ఇంటితాళం తీసి చూడగా.. అసలు విషయం బయటపడింది.
వంటగదిలో కొన్ని నిమ్మకాయలు, ఉప్పు, సింధూరం, ఓ రాయి ఉండటాన్ని గమనించాడు. కాకాసాహెబ్ భార్య ఓ మాంత్రికురాలు కావడం వల్ల సూర్యకాంత్కు అనుమానం వచ్చి పోలీసులకు సమాచారం అందించాడు. వెంటనే అక్కడకు చేరుకున్న పోలీసులు ఘటనా స్థలాన్ని పరిశీలించి తవ్వకాలు జరపగా.. ఓ మృతదేహం బయటపడింది. శవపరీక్షల నిమిత్తం ఆస్పత్రికి తరలించారు. దీనిపై కేసు నమోదు చేసుకున్న పోలీసులు కాకాసాహెబ్ కుటుంబం కోసం గాలిస్తున్నట్లు తెలిపారు. దాదాపు మూడు నెలల క్రితమే కాకాసాహెబ్ భార్య.. చంపేసి ఉండొచ్చని పోలీసులు అనుమానం వ్యక్తం చేస్తున్నారు. హత్యకు గల అసలు కారణాలు ఇంకా తెలియాల్సి ఉందని పోలీసులు తెలిపారు.
వీడియోల మోజులో పడి ముగ్గురు మృతి..
సోషల్మీడియా రీల్స్ మోజులో పడి.. ముగ్గురు ప్రాణాలు పోగొట్టుకున్నారు. రైల్వేట్రాక్పై వీడియోలు చేస్తున్న మహిళ, ఇద్దరు పురుషుల్ని ట్రైన్ ఢీకొట్టింది. దీంతో వారంతా అక్కడికక్కడే మృతి చెందారు. ఈ ప్రమాదం ఉత్తర్ప్రదేశ్లోని గాజియాబాద్లో బుధవారం రాత్రి జరిగింది. సమాచారం అందుకున్న పోలీసులు.. శవపరీక్షల నిమిత్తం మృతదేహాలను ఆస్పత్రికి తరలించారు. మృతుల వివరాలు తెలియాల్సి ఉందని పోలీసులు వెల్లడించారు.
మంటల్లో చిక్కుకొని.. మృతి చెందిన 6నెలల చిన్నారి..
ఉత్తర్ప్రదేశ్లో మంటల్లో చిక్కుకొని ఆరునెలల చిన్నారి మృతి చెందగా.. మరో ఇద్దరు గాయపడ్డారు. ఈ ప్రమాదం ఉత్తర్ప్రదేశ్లోని ఆగ్రాలో బుధవారం రాత్రి జరిగింది. డోరిలాల్ భార్య రాజకుమారి.. తమ కుమారై దేవతి కావ్య కోసం గ్యాస్పైన పాలు వేడిచేస్తోంది. ఆ సమయంలో ఒక్కసారిగా గ్యాస్లీకై ఇల్లంతా మంటలు వ్యాపించాయి. ఆ మంటల్లో చిక్కుకొని ఇంట్లో నిద్రిస్తున్న చిన్నారి కావ్య మరణించింది. మంటలు ఆర్పేందుకు ప్రయత్నించిన డోరిలాల్, అతడి కుమారుడు రిషికి గాయాలయ్యాయి. వెంటనే పోలీసులు ఘటనా స్థలానికి చేరుకొని మంటల్ని అదుపుచేసి బాధితులను ఆస్పత్రికి తరలించారు.
కరెంట్ షాక్ తగిలి నలుగురు బలి..
మహారాష్ట్రలో నలుగురు వ్యక్తులు కరెంట్ షాక్కు బలయ్యారు. పుణెలోని బోరా ప్రాంతంలో గురువారం జరిగిందీ ఘటన. నదిలో విద్యుత్ మోటర్ బిగిస్తుండగా.. నలుగురు వ్యక్తులు అక్కడికక్కడే మృతిచెందారు. సమాచారం అందుకున్న పోలీసులు ప్రమాదస్థలానికి చేరుకొని రెండు మృతదేహాలను కనుగొన్నారు. మిగిలిన వాటికోసం గాలిస్తున్నట్లు తెలిపారు.
