ఉత్తర్ప్రదేశ్లో సైబర్ నేరగాళ్లు మరోసారి రెచ్చిపోయారు. లఖ్నవూలోని బలరాంపుర్ ఆస్పత్రిలోని కంప్యూటర్ నెట్వర్క్ను హ్యాక్ చేసి, భారీ మోసానికి పాల్పడ్డారు. నకిలీ జనన, మరణ ధ్రువపత్రాలను తయారు చేసి, వాటిని వివిధ వ్యక్తులకు అందించారు. ఈ వ్యవహారాన్ని నెలరోజులపాటు దుండగులు కొనసాగించారు. ఈ మోసాన్ని గుర్తించిన ఆస్పత్రి యాజమాన్యం.. వజీర్గంజ్ పోలీస్ స్టేషన్లో ఫిర్యాదు చేసింది.
ప్రసూతి వార్డు లేకపోయినా..
బలరాంపుర్ ఆస్పత్రిలో గైనకాలజీ, ప్రసూతి వార్డు లేనే లేవు. ఇక్కడ ఏ మహిళా ఇప్పటివరకు శిశువుకు జన్మనివ్వలేదు. అయినప్పటికీ.. తమ ఆస్పత్రి నుంచి 41 జనన ధ్రువీకరణ పత్రాలు జారీ అయ్యాయని ఆస్పత్రి అధికారులు గుర్తించారు. అయితే.. ఈ తరహా మోసాలు ఇంకా ఏమైనా జరిగాయా? అన్న కోణంలోనూ ఇంటర్నల్ ఆడిట్ నిర్వహిస్తున్నట్లు పేర్కొన్నారు.
ఈ హ్యాకింగ్ వెనుక ఆల్-ఇండియా రాకెట్ ఉండి ఉంటుందని పోలీసులు అనుమానిస్తున్నారు. దేశవ్యాప్తంగా ఉన్న ఆస్పత్రుల్లో నకిలీ జనన, మరణ ధ్రువీకరణ పత్రాలను ఆన్లైన్లో తయారు చేసి, వాటిని ఈ ముఠా అమ్ముతున్నట్లు భావిస్తున్నారు.
నెలరోజులుగా..
చీఫ్ రిజిస్ట్రార్ కింద పని చేసే పౌర రిజిస్ట్రేషన్ వ్యవస్థ(సీఆర్ఎస్)తో అనుసంధానమైన ఓ పోర్టల్ ద్వారా తాము సర్టిఫికేట్లు ఇస్తామని బలరాం ఆస్పత్రిలో ధ్రువీకరణ పత్రాలు జారీ చేసే అధికారి డాక్టర్ ఎం.పి.సింగ్ తెలిపారు. అయితే.. నెలరోజులుగా పోర్టల్లోకి లాగిన్ కావడంలో సమస్యలు ఎదురుకాగా అనుమానం వచ్చిందని వెల్లడించారు.
"మా ఆస్పత్రికి ప్రత్యేక ఐడీ, పాస్వర్డ్ ఉంటాయి. అయితే.. గత నెలరోజులుగా మరణ ధ్రువీకరణ పత్రాలను జారీ చేసేందుకు ప్రయత్నించినప్పుడు పోర్టల్లో మాకు కొన్ని సమస్యలు ఎదురవుతూ వచ్చాయి. మేము దీనిపై చీఫ్ రిజిస్ట్రార్ కార్యాలయానికి ఫిర్యాదు చేశాం. అనంతరం ఆగస్టు 16న మళ్లీ మాకు పోర్టల్ యాక్సెస్ చేసేందుకు వీలు కాలేదు. దాంతో.. కంప్యూటర్ నిపుణులు, ఆరోగ్య డైరెక్టరేట్ అధికారులకు తెలియజేశాం. అప్పుడు చేపట్టిన దర్యాప్తులో కంప్యూటర్ నెట్వర్క్ హ్యాకింగ్ గురైనట్లు తేలింది."
-డాక్టర్ ఎం.పి.సింగ్, బలరాం ఆస్పత్రి అధికారి
బలరాంపుర్ ఆస్పత్రి తరహాలో ఇతర ఆస్పత్రుల్లో ఏమైనా సమస్యలు ఎదురైతే తమకు తెలియజేయాలని ఆస్పత్రులను కోరామని ముఖ్య వైద్య అధికారి డాక్టర్ మనోజ్ అగర్వాల్ తెలిపారు. దీనిపై కేసు నమోదు చేసుకుని దర్యాప్తు చేస్తున్నట్లు చౌక్ ఏసీపీ ఐ.పి.సింగ్ తెలిపారు.
ఇదీ చూడండి:Drug smuggling: పొట్టలో రూ.11కోట్లు విలువైన కొకైన్
ఇదీ చూడండి:'చెల్లెలి కొడుకే అమ్మకు ఇష్టం.. అందుకే చంపేశా'
