Kolkata Metro Works : బంగాల్లోని కోల్కతాలోని మెట్రో రైలు పనులు శరవేగంగా సాగుతున్నాయి. బౌబజార్ ప్రాంతంలో ఉన్న పది ఇళ్లల్లో శుక్రవారం ఉదయం భారీగా పగుళ్లు ఏర్పడ్డాయి. దీంతో భయాందోళనకు గురైన నివాసితులు.. ప్రాణభయంతో సామాన్లు తీసుకుని బయటకు పరుగులు తీశారు. అయితే తమ కష్టాలకు అధికారులే కారణమని స్థానికులు ఆరోపిస్తున్నారు.
సమాచారం తెలుసుకున్న పోలీసు బలగాలు.. పెద్ద ఎత్తున ఘటనాస్థలిలో మోహరించాయి. స్థానిక ప్రజాప్రతినిధులు కూడా అక్కడకు చేరుకున్నారు. 2019లో కూడా ఇదే తరహా ఘటన జరిగింది. అనేక భవనాల్లో పగుళ్లు ఏర్పడడం వల్ల తమ ఇళ్లను ఖాళీ చేసి వేరే ప్రాంతాలకు తరలివెళ్లారు స్థానికులు.