'భారతీయులందరికీ టీకా అందేది అప్పుడే'

2022 చివరి నాటికి దేశ పౌరులందరికీ కరోనా టీకా అందుబాటులోకి వస్తుందని పేర్కొన్నారు ప్రముఖ వైద్య నిపుణులు డా. సునీలా గార్గ్. ఈటీవీ భారత్​కు ప్రత్యేక ఇంటర్వ్యూ ఇచ్చిన గార్గ్.. వ్యాక్సినేషన్ కోసం కేంద్ర ప్రభుత్వం కొవిన్ అనే యాప్​ను రూపొందించినట్లు చెప్పారు. వ్యాక్సిన్ పంపిణీ ప్రక్రియలో ప్రైవేటు సంస్థలది కీలక పాత్ర అని పేర్కొన్నారు.

వ్యాక్సిన్ పంపిణీ కోసం కేంద్ర ప్రభుత్వం ఏర్పాట్లు చేస్తున్న నేపథ్యంలో దిల్లీలోని మౌలానా ఆజాద్ మెడికల్ కళాశాల కమ్యూనిటీ మెడిసిన్ డైరెక్టర్ డా. సునీలా గార్గ్ కీలక వ్యాఖ్యలు చేశారు. ప్రస్తుతం అందుబాటులో ఉన్న సమాచారాన్ని బట్టి 2022 చివర్లో లేదా 2023 మొదట్లో కరోనా టీకా దేశ ప్రజలందరికీ అందుబాటులోకి వస్తుందని అంచనా వేశారు. కేంద్ర వైద్య శాఖకు సలహాదారుగా పనిచేస్తున్న గార్గ్.. ఈటీవీ భారత్​కు ప్రత్యేక ఇంటర్వ్యూ ఇచ్చారు.

"ప్రతి ఒక్కరికి రెండు డోసుల వ్యాక్సిన్ అవసరం. దీని ప్రకారం మన కోల్డ్​ స్టోరేజీ, సప్లై చైన్ సదుపాయాలను లెక్కలోకి తీసుకుంటే 2022 చివర్లో లేదంటే 2023 మొదట్లో భారత్​లోని ప్రతి పౌరుడికి కొవిడ్ టీకా అందుతుంది. ఇది కూడా వ్యాక్సిన్ సరఫరా చేసే సంస్థలపై ఆధారపడి ఉంటుంది."

-డా. సునీలా గార్గ్, వైద్య నిపుణులు

137 కోట్ల జనాభా ఉన్న భారత్​లో 80 శాతం మందికి(14 ఏళ్లలోపు వారిని మినహాయించి) తొలుత వ్యాక్సిన్ అందించే అవకాశం ఉందని పేర్కొన్నారు సునీలా గార్గ్. దాదాపు 25 శాతం మందికి యాంటీబాడీలు ఉంటాయని, వారు టీకా ప్రాధాన్య జాబితాలోకి రారని చెప్పుకొచ్చారు.

వ్యాక్సిన్ సేకరణ, పంపిణీ, నిల్వ ప్రక్రియలో ప్రైవేటు సంస్థలు కీలక పాత్ర పోషిస్తాయని పేర్కొన్నారు గార్గ్. దేశంలో 70 శాతం జనాభా ప్రైవేటు రంగం నుంచే వైద్య సేవలు పొందుతున్నారని తెలిపారు. ఈ నేపథ్యంలో టైర్ 1, 2 నగరాల్లో ప్రైవేటు సంస్థలు కీలకంగా వ్యవహరిస్తాయని చెప్పారు.

టీకా సేకరణ, నిల్వ, పంపిణీ, డోసు కాలక్రమానికి సంబంధించిన వివరాలు పొందుపర్చేందుకు 'కొవిన్' అనే అప్లికేషన్​ను కేంద్ర ప్రభుత్వం అభివృద్ధి చేసినట్లు గుర్తుచేశారు గార్గ్. తద్వారా సమాచారాన్ని వేగంగా అప్​లోడ్ చేసేందుకు అధికారులకు వీలు కలుగుతుందని పేర్కొన్నారు.

కేంద్రం ప్రణాళికలు

కరోనా టీకా పంపిణీ కోసం కేంద్రం ఇప్పటికే కసరత్తు ప్రారంభించింది. ప్రాధాన్య క్రమంలో వ్యాక్సిన్ ఇచ్చే విధంగా బ్లూ ప్రింట్ తయారు చేసింది. దీని ప్రకారం వైద్య సేవల సిబ్బందికి ముందుగా కరోనా టీకా అందిస్తారు. తర్వాత పోలీసులకు, పారిశుద్ధ్య కార్మికులకు, యాభై ఏళ్లు పైబడిన వారికి ఇస్తారు. అనంతరం ఇతర వ్యాధులు ఉన్నవారికి టీకాను అందిస్తారు.