దేశంలో మరో 797 కొవిడ్​ కేసులు- వ్యాపిస్తున్న JN.1 వేరియంట్

Covid Cases In India : దేశంలో కొత్తగా 797 కరోనా కేసులు నమోదైనట్లు కేంద్ర ఆరోగ్య శాఖ శుక్రవారం వెల్లడించింది. దీంతో యాక్టివ్​ కేసులు 4,091కు చేరుకున్నట్లు చెప్పింది. మరోవైపు కొవిడ్​ కొత్త వేరియంట్​ జేఎన్​.1 వేరియంట్ కేసులు డిసెంబర్​ 28 నాటికి 145కు చేరుకున్నాయి.

Covid Cases In India :దేశంలో కొవిడ్​ కేసులు పెరుగుతున్నాయి. గురువారం ఉదయం 8 గంటల నుంచి శుక్రవారం ఉదయం 8 గంటల వరకు 797 కొత్త కొవిడ్ కేసులు నమోదయ్యాయని కేంద్ర ఆరోగ్య మంత్రిత్వశాఖ శుక్రవారం తెలిపింది. మొత్తం ఐదుగురు (కేరళ (2), మాహారాష్ట్ర (1), పుదుచ్చేరి (1), తమిళనాడు​ (1)) మృతిచెందారని తెలిపింది. 2023 మేలో గరిష్ఠంగా 865 కొవిడ్ కేసులు నమోదయ్యాయి. గత 225 రోజుల్లో ఇదే అత్యధికం అని చెప్పింది. ప్రస్తుతం క్రీయాశీల కేసుల సంఖ్య 4,091కి చేరిందని వెల్లడించింది.

కేంద్ర ఆరోగ్యశాఖ వెబ్‌సైట్ ప్రకారం కొవిడ్​ వైరస్​ బారి నుంచి 4.4 కోట్ల మంది కోలుకున్నారు. ప్రస్తుతం రికవరీ రేటు 98.81 శాతంగా ఉంది. దేశంలో ఇప్పటివరకు 220.67 కోట్ల కొవిడ్ టీకాలు వేశారు. దాదాపు నాలుగేళ్లలో దేశవ్యాప్తంగా 5.3 లక్షల మంది ఈ మహమ్మారి వల్ల చనిపోయారు. అయితే ఈ ఏడాది డిసెంబరు 5 నాటికి రోజువారీ కేసుల సంఖ్య తగ్గింది. కొత్త వేరియంట్, చల్లని వాతావరణ పరిస్థితుల కారణంగా కొవిడ్​ కేసులు మళ్లీ పెరుగుతున్నాయి.

JN.1 Cases In India : మరోవైపు నవంబర్ 21 నుంచి డిసెంబర్ 18 నాటికి కలెక్ట్​ చేసిన శాంపిళ్లలో డిసెంబర్ 28 నాటికి 145 జేఎన్​.1 వేరియంట్ కేసులు నమోదయ్యాయి. JN.1 అనేది ఒమిక్రాన్​ సబ్​ వేరియంట్​. దీన్ని BA.2.86 లేదా పిరోలా అని పిలుస్తారు. ఈ JN.1 వేరియంట్ మొదటి కేసు కేరళలో నమోదైంది.

7 రోజుల ఐసోలేషన్ తప్పనిసరి!
రాష్ట్రంలో కొవిడ్ కేసులు పెరుగుతున్న క్రమంలో పాజిటివ్​ రోగులకు ఏడు రోజుల హోమ్​ ఐసోలేషన్ తప్పనిసరి చేసింది కర్ణాటక ప్రభుత్వం. మంగళవారం ఒక్కరోజులోనే 74 కొత్త కేసులు నమోదైన నేపథ్యంలో ఈ నిర్ణయం తీసుకుంది. ఈ మేరకు గురువారం సమావేశమైన కర్ణాటక క్యాబినెట్​ సబ్​ కమిటీ, ప్రజలందరూ మాస్కులు ధరించాలని సూచించింది. కరోనా లక్షణాలు ఉన్న పిల్లలను పాఠశాలలకు పంపించరాదని చెప్పింది. కొవిడ్ కేసుల పెరుగుదల, JN.1 వేరియంట్​ కేసులు పెరుగుతున్న నేపథ్యంలో భౌతిక దూరం, ఏడు రోజుల హోమ్​ ఐసోలేషన్ వంటివి పాటించాలని సూచించింది. పూర్తి వివరాల కోసంఈ లింక్​పై క్లిక్ చేయండి.