'కరోనా 2.0.. సునామీలా విరుచుకుపడే అవకాశం'

కరోనా మహమ్మారి మళ్లీ విజృంభించే అవకాశం ఉందని మహారాష్ట్ర సీఎం ఉద్ధవ్​ ఠాక్రే హెచ్చరించారు. వ్యాక్సిన్ అందుబాటులోకి రాలేదని, ప్రతి ఒక్కరూ జాగ్రత్తలు పాటించాల్సిన అవసరం ఉందన్నారు. మళ్లీ లాక్​డౌన్​ విధించే పరిస్థితి తెచ్చుకోవద్దన్నారు.

దేశంలోని కొన్ని ప్రాంతాల్లో కరోనా కేసులు మళ్లీ పెరుగుతున్న వేళ మహారాష్ట్ర సీఎం ఉద్ధవ్​ ఠాక్రే కీలక వ్యాఖ్యలు చేశారు. కరోనా రెండో వేవ్​ సునామీలా విరుచుకుపడే అవకాశం ఉందన్నారు. ఈ సందర్భంగా రెండో లాక్​డౌన్​ గురించి సూచనలు చేశారు.

ప్రతి ఒక్కరూ కరోనా నిబంధనలు పాటించాలని ఠాక్రేతోపాటు ఉపముఖ్యమంత్రి అజిత్ పవార్​.. ప్రజలకు సూచించారు. మాస్కులు, భౌతిక దూరం, పరిశుభ్రత వంటి నియంత్రణ చర్యలు తీసుకోవాలన్నారు.

"మనకు ఇంకా వ్యాక్సిన్ అందుబాటులోకి రాలేదు. ఈ వ్యాధికి చికిత్స లేదు. అందుకే మనం జాగ్రత్తలు పాటించాల్సిన అవసరం ఉంది. నిర్లక్ష్యం వహిస్తే మహమ్మారి మళ్లీ విజృంభించే అవకాశం ఉంది. మనకు మరో లాక్​డౌన్​ వద్దు. ఈ ఐదేళ్లు లాక్​డౌన్లతోనే గడిపేయాలనుకోవట్లేదు. ముప్పు ఇంకా తొలగిపోలేదు. పండుగల వేళ సంయమనం పాటించాలి."

- ఉద్ధవ్​ ఠాక్రే, మహారాష్ట్ర సీఎం

ఇదీ చూడండి:టీకా అత్యవసర అనుమతులపై కేంద్రం దృష్టి